"ტვ პირველის" ჟურნალისტის კითხვაზე — გდდ ყოფილი თანამშრომლის, ირაკლი შაიშმელაშვილისთვის აშშ-ში თავშესაფრის მიცემანიშნავს თუ არა იმას, რომ აშშ-სთვის არასანდოა ის სამართლებრივი სტატუსი, რაც მას საქართველოში აქვს, ირაკლი კობახიძე პასუხობს, რომ ეს მათთვის საინტერესო არ არის, ბოლო დროს აშშ-სთან აქვთ გახშირებული კომუნიკაცია და მაისის ბოლოსაც იგეგმება კომუნიკაციის, რომლის "დეტალებზე საუბარი თვის ბოლოს ექნებათ".

"კი, [გავლენიანი იყო], კრამიტებს ამტვრევდა გდდ-ში, რა გავლენიანი იყო შაიშმელაშვილი? როგორ შეიძლება გავლენიან ფიგურად გამოაცხადოთ ვიღაც შაიშმელაშვილი გდდ-ში? [...] თავშესაფარი შეიძლება ადამიანმა მიიღოს სხვადასხვა საფუძვლით. ხანდახან ადამიანები ბარდებიან სხვა ქვეყანას, ამბობენ, რომ არიან კონკრეტული მიმართულების წარმომადგენლები და ამის გამო იდევნებიან და ათას ტყუილს ამბობენ ხოლმე, საერთოდ არ არის ეს ტექნიკური საკითხი, ეს არ არის საინტერესო, ჩვენთვის არის საინტერესო რა, რომ ბოლო დროს გვაქვს გახშირებული კომუნიკაცია ამერიკელ პარტნიორებთან, მე პირადად მქონდა ზარი ბატონ რუბიოსთან, იგეგმება შემდგომი კომუნიკაცია კონკრეტული დეტალების განხილვა. ამაზე ვართ კონცენტრირებული. საერთოდ არ არის საინტერესო კონკრეტული პირი, რომელიც ჩაბარდა ლტოლვილად სხვა ქვეყანას. იქნება კომუნიკაცია, დანარჩენს გაიგებთ სათანადო დროს. დეტალებზე გვექნება უკვე საუბარი თვის ბოლოს. ასეთია წინასწარი განაცხადი, რომ მაისის ბოლოსთვის კონკრეტული ფორმატის ფარგლებში უნდა განვიხილოთ კონკრეტული დეტალები, ვნახოთ დაველოდებით ინტერესით ამ ყველაფერს", —განაცხადა ირაკლი კობახიძემ.

შეგახსენებთ, ირაკლი შაიშმელაშვილმა შინაგან საქმეთა სამინისტრო 2024 წლის 3 დეკემბერს, პროევროპული აქციების ძალისმიერი დარბევის ფონზე, პროტესტის ნიშნად დატოვა. სისტემიდან წასვლისა და ქვეყნიდან გამგზავრების შემდეგ, პროკურატურამ მის წინააღმდეგ სისხლის სამართლის საქმე აღძრა.

2026 წლის 7 მაისს თბილისის საქალაქო სასამართლოს მოსამართლე ირაკლი ხუსკივაძემ შაიშმელაშვილს დაუსწრებლად 2 წლით თავისუფლების აღკვეთა მიუსაჯა. საქმე 2025 წლის 4 ოქტომბრის მოვლენებს ეხება, რომელზეც სხვა ბრალდებულ პოლიტიკოსებსა და პირებსაც მიესაჯათ სხვადასხვა ვადით პატიმრობა. შაიშმელაშვილი ამჟამად ამერიკის შეერთებულ შტატებში იმყოფება.