ჟურნალისტებთან საუბრისას ირაკლი კობახიძემ ევროპარლამენტის მიერ სამთავრობო ტელეკომპანია "იმედისთვის" მუშაობის აკრძალვას და მოლდოვის მიერ სამთავრობო ტელეკომპანიების, "რუსთავი 2"-სა და "პოსტვი"-სთვის აკრედიტაციის გაუქმებას ეხმაურება. ის აკრიტიკებთ ევროსტრუქტურებს და ამბობს, რომ "მათთვის არაფერს ნიშნავს მედიის თავისუფლება".

"თქვენ ხედავთ, რომ ევროპული სტრუქტურები სრულად კარგავენ სახეს. მათთვის არაფერს ნიშნავს მედიის თავისუფლება, რაც დაიწყო ბრიტანეთმა, ის გააგრძელა ახლა ევროპარლამენტმა. არის სრულიად სამარცხვინო, რა თქმა უნდა, არავითარ სტანდარტებში არ ჯდება ის გადაწყვეტილება რაც მათ მიიღეს.

მედიის თავისუფლება არაფრად უღირს ევროპარლამენტს. ძალიან ემსგავსება, უკვე დაემსგავსა, უფრო სწორად, ევროპარლამენტი საბჭოთა კავშირის უზენაეს საბჭოს. ეს არის ტრაგიკული მდგომარეობა რასაც ჩვენ ვხედავთ.

აბსოლუტურად საბჭოური მიდგომაა რასაც ავლენენ კონკრეტული ევროპელი პოლიტიკოსები და, რა თქმა უნდა, ასეთ დროს არ გვიკვირს, რომ კონკრეტული პოლიტიკოსები, რომლებიც ასეთი ინიციატივებით გამოდიან, სარგებლობენ ძალიან საეჭვო რეპუტაციით, საეჭვო წარსული აქვთ. აბსოლუტური გასაკვირი არ არის. ეს მთლიან დეგრადაციაზე მეტყველებს, რასაც ვხედავთ ევროპარლამენტში.

რაც შეეხება მოლდოვას, მოლდოვაში მედიის თავისუფლება დიდი ხანია ფეხქვეშაა გათელილი, მოლდოვაში დატოვეს სულ 2 ტელევიზია — საზოგადოებრივი მაუწყებელი 1 და საზოგადოებრივი მაუწყებელი 2. სინამდვილეში ორი სახელმწიფო ტელევიზია ფუნქციონირებს მოლდოვაში. ესეც მეტყველებს საერთო მდგომარეობაზე. თუმცა იცით, რომ მოლდოვას არავინ ამისთვის არ აკრიტიკებს. ასეთ ფონზე, როცა ორი სახელმწიფო ტელევიზია დატოვეს, ასეთ პირობებში არავის უკვირს, რომ მოლდოვის ხელისუფლება თავს ესხმის ქართულ თავისუფალ მედიას. მათ შეზღუდეს თავისუფალი მედია მოლდოვაში და ახლა თავს ესხმიან თავისუფალ მედიას საქართველოში. ეს არის აბსოლუტურად ლოგიკური მოვლენათა ჯაჭვი", — განაცხადა ირაკლი კობახიძემ.

სამთავრობო ტელეკომპანია "იმედს" ევროპარლამენტში საქმიანობა ერთი წლით აეკრძალა, ხოლო მოლდოვამ — "იმედს", "რუსთავი ორსა" და "პოსტივის", ევროპის საბჭოს მინისტრთა კომიტეტის 135-ე სესიის გაშუქებაზე უარი უთხრა. ინფორმაციას ტელეკომპანია "იმედი" ავრცელებს.