როგორც უკვე ცნობილია, ოქროს გლობუსის დაჯილდოება 2027 წლის 10 იანვარს ჩატარდება. დაჯილდოებას კვლავ ნიკი გლეიზერი გაუძღვება.

განაცხადების მიღება 1-ელი ივნისიდან დაიწყება. ფილმების, სერიალებისა და პოდკასტების წარდგენის ბოლო ვადა კი 30 ოქტომბერია.

ხელოვნური ინტელექტის შესახებ ახალ წესებში ვკითხულობთ, რომ AI-ს გამოყენებისათვის ნამუშევარი კონკურსს ავტომატურად არ გამოეთიშება. მთავარია, წამყვანი როლი ადამიანის კრეატიულ ხედვას ეკავოს. AI და მსგავსი ტექნოლოგიები მხოლოდ დამხმარე ინსტრუმენტები უნდა იყოს და ადამიანის შემოქმედებითი წვლილი არ უნდა ჩაანაცვლოს. ხელოვნური ინტელექტის გამოყენების შემთხვევაში, კომიტეტი განაცხადს დეტალურად შეისწავლის და შესაძლოა, დამატებითი ინფორმაციაც მოითხოვოს. ამ ინფორმაციის დროულად წარუდგენლობამ, შესაძლოა, ნამუშევრის დისკვალიფიკაცია გამოიწვიოს.

სამსახიობო და სხვა კატეგორიების წესებში ვკითხულობთ, რომ ნომინაციაზე წარდგენილი როლი თავად მსახიობის ნამუშევარი უნდა იყოს. ისეთი შესრულება, რომელიც ძირითადად ხელოვნური ინტელექტის მიერ არის შექმნილი, კონკურსზე არ დაიშვება. ასევე, აკრძალულია მსახიობის გამოსახულების, ხმის ან ბიომეტრიული მონაცემების უნებართვოდ გამოყენება.

რაც შეეხება არასამსახიობო კატეგორიებს, აქ ნამუშევრის ძირითადი შემოქმედებითი წვლილი — მათ შორის რეჟისურა, სცენარი, მუსიკა და ანიმაცია — უმეტესწილად ადამიანებს უნდა ეკუთვნოდეთ.