პარლამენტის პლენარულ სხდომაზე, საარჩევნო პროცესის დროს ძალადობის აღკვეთის მიზნით სისხლის სამართლის კოდექსში შესატან ცვლილებას პირველი მოსმენით მხარი დაუჭირეს.

იუსტიციის სამინისტროს მიერ ინიცირებული პროექტის მიხედვით, კოდექსს უნდა დაემატოს მუხლი 1621, რომლის მიხედვით, საარჩევნო უბანზე, საარჩევნო კომისიის განთავსების ადგილას, ან მათ მიმდებარე ტერიტორიაზე, წინასაარჩევნო კამპანიის ღონისძიების დროს ძალადობა ან ძალადობის მუქარა დაისჯება ჯარიმით ან/და თავისუფლების აღკვეთით ვადით ორ წლამდე.

იგივე ქმედება, რაც ჯანმრთელობის განზრახ მსუბუქ დაზიანებას გამოიწვევს, დაისჯება ჯარიმით ან/და თავისუფლების აღკვეთით ვადით სამ წლამდე.

ამავე მუხლით გათვალისწინებული ქმედება, რომელიც ჯგუფურად იქნება ჩადენილი, დაისჯება თავისუფლების აღკვეთით ვადით ორიდან ხუთ წლამდე.

კანონპროექტში აღნიშნულია, რომ 125-ე მუხლის პირველი ნაწილი, რომელიც გულისხმობს ცემას, ან სხვაგვარ ძალადობას, რამაც დაზარალებულის ფიზიკური ტკივილი გამოიწვია, დაისჯება ჯარიმით, ან საზოგადოებისათვის სასარგებლო შრომით ვადით 120-დან 180 საათამდე, ანდა თავისუფლების აღკვეთით, ვადით ერთ წლამდე. ამჟამინდელი კანონმდებლობით, სანქციად გათვალისწინებულია საზოგადოებისთვის სასარგებლო შრომა 120–დან 180 საათამდე, ანდა გამასწორებელი სამუშაო ვადა 15 თვემდე.

ახალგაზრდა იურისტთა ასოციაციის განცხადებით, აღნიშნული დიდწილად დააბრკოლებს არჩევნების თავისუფალ გარემოში წარმართვის შესაძლებლობას.

საია: უბნებთან პატრულის მობილიზება დააბრკოლებს არჩევნების თავისუფალად ჩატარებას