შალვა პაპუაშვილი EPC-ის სამიტზე ვოლოდიმირ ზელენსკისა და ირაკლი კობახიძის შეხვედრას გამოეხმაურა. მან იმედი გამოთქვა, რომ ორი ქვეყნის ლიდერების შეხვედრის "ინიციატივა პრეზიდენტ ზელენსკის მხრიდან არის შედეგი გადააზრებისა, რომ ის პოლიტიკა, რომელიც საქართველოსა და ქართველი ხალხის მიმართ იყო, იყო მცდარი." მისივე განმარტებით, თუკი ვინმეს აქვს ნაბიჯი გადასადგმელი და გამოსასწორებელი, ეს არის უკრაინის ხელისუფლება.

"4 წელზე მეტია უკრაინის ხელისუფლებისგან, სამწუხაროდ, ვხედავთ პოლიტიკას, რომელიც არა თუ ქართველი ხალხის წინააღმდეგ არის მიმართული, უკრაინელის ხალხის ინტერესსაც არ ემსახურება. 4 წელია ვხედავთ, რომ ეს ურთიერთობა სწორედ უკრაინის ხელისუფლების გადაწყვეტილებით არის იმ წერტილზე მისული, სადაც არის. ჩვენ ამ ურთიერთობაში ყოველთვის ხაზს ვუსვამდით, რომ საქართველო და საქართველოს ხელისუფლება მხარს ვუჭერდით უკრაინელ ხალხს და უკრაინას, არ არსებობს რეზოლუცია რომელსაც ჩვენ მხარი არ დავუჭირეთ. იმ პირობებში, როდესაც ჩვენ ათობით ათასი უკრაინელი ლტოლვილი მივიღეთ. ასობით უკრაინელი ბავშვისთვის ერთადერთმა ქვეყანამ გავხსენით უკრაინულენოვანი კლასები სკოლებში და უკრაინელი ლტოლვილები გავათანაბრეთ ქართველ დევნილებთან.

ამის საპასუხოდ, როდესაც უკრაინის მთავრობა საქართველოს რიტორიკულად თუ სხვა მხრივ თავს ესხმოდა, რა თქმა უნდა, ეს იყო გასაკვირი და მიუღებელი. ამიტომ, თუკი ვინმეს აქვს ნაბიჯი გადასადგმელი და გამოსასწორებელი, ეს არის უკრაინის ხელისუფლება. ვნახოთ, მე იმედი მაქვს, რომ ეს ინიციატივა პრეზიდენტ ზელენსკის მხრიდან არის შედეგი გადააზრებისა, რომ ის პოლიტიკა, რომელიც საქართველოსა და ქართველი ხალხის მიმართ იყო, იყო მცდარი. ჩვენ ყველანაირად გვერდში ვუდგავართ უკრაინელ ხალხს და იმედია, რომ უკრაინის ხელისუფლება, უპირველეს ყოვლისა, საკუთარ ხალხის ინტერესებიდან გამომდინარე შეცვლის თავის დამოკიდებულებას", — თქვა პაპუაშვილმა.

შეგახსენებთ, სომხეთში ევროპული პოლიტიკური გაერთიანების მე-8 სამიტზე ჩასული ირაკლი კობახიძე მაკა ბოჭორიშვილთან ერთად ვოლოდიმირ ზელენსკისა და ანრეი სიბიჰას შეხვდა.

ცნობისთვის, EPC-ის ფორუმს დაესწრებიან ლიდერები ევროკავშირის 27 წევრი სახელმწიფოდან, აგრეთვე ალბანეთიდან, ანდორიდან, სომხეთიდან, აზერბაიჯანიდან, ბოსნია და ჰერცეგოვინიდან, კანადიდან, საქართველოდან, ისლანდიიდან, კოსოვოდან, ლიხტენშტაინიდან, მოლდოვიდან, მონაკოდან, მონტენეგროდან, ჩრდილოეთ მაკედონიიდან, ნორვეგიიდან, სან-მარინოდან, სერბეთიდან, შვეიცარიიდან, თურქეთიდან, უკრაინიდან და გაერთიანებული სამეფოდან.

ევროპული პოლიტიკური გაერთიანება (EPC) არის სამთავრობოთაშორისო ფორუმი ევროპის მომავლის შესახებ პოლიტიკური და სტრატეგიული დისკუსიებისთვის, რომელიც 2022 წელს, უკრაინაში რუსეთის სრულმასშტაბიანი შეჭრის შემდეგ დაარსდა.