ანაკლიის ღრმაწყლოვანი პორტის პროექტში მნიშვნელოვანი სიახლეები იკვეთება. ეკონომიკის სამინისტროს სსიპ "ნაკლიის ღრმაწყლოვანი ნავსადგურის განვითარების სააგენტომ" PORT CONSULTANT ROTTERDAM-თან 24 აპრილს გააფორმა ხელშეკრულება, რომლის ღირებულება 101 480 ევროს შეადგენს. ინფორმაციას bm.ge ავრცელებს.

დოკუმენტის თანახმად, უცხოურმა საკონსულტაციო კომპანიამ პორტის არსებული გენერალური გეგმის ალტერნატივები უნდა შეისწავლოს და სახელმწიფოს განახლებული პროექტი წარუდგინოს.

კონტრაქტით გათვალისწინებულია რამდენიმე საკვანძო მიმართულება:

გენერალური გეგმის გადახედვა: არსებული "მასტერპლანის" ალტერნატივების მომზადება და შესაბამისი კაპიტალური დანახარჯების (CAPEX) განახლებული ბიუჯეტის შედგენა.

ტვირთნაკადის პროგნოზი: 2050 წლამდე პორტის პოტენციური ტვირთბრუნვის ხელახალი გაწერა.

მმართველობის მოდელი: რეკომენდაციების მომზადება პორტის მართვის ოპტიმალურ სტრუქტურაზე.

აღსანიშნავია, რომ ხელშეკრულების ტექსტში არ არის დაკონკრეტებული, თუ რამ განაპირობა გეგმის ფუნდამენტური ცვლილების საჭიროება.

ეს სიახლე მიანიშნებს იმაზე, რომ ჩინურ სახელმწიფო კორპორაცია CCCC-თან მიმდინარე მოლაპარაკებები, რომლებიც წინა გეგმებსა და პროგნოზებს ეფუძნებოდა, ჯერჯერობით საბოლოო შედეგამდე არ მისულა.

სანამ საინვესტიციო ხელშეკრულება გაურკვეველია, სახელმწიფო პორტის მშენებლობას საკუთარი სახსრებით აგრძელებს. მთავრობა ინფრასტრუქტურულ სამუშაოებზე მიმდინარე წელს 50 მილიონ ლარს დახარჯავს.

ამ საკითხთან დაკავშირებით საზოგადოებას მიმართა ძლიერი საქართველო — ლელოს ერთ-ერთმა ლიდერმა, ირაკლი კუპრაძემ. მისი განმარტებით ოფიციალური დოკუმენტები ადასტურებს, რომ ხელისუფლება არსებული გენერალური გეგმის შეცვლას და პროექტის ხელახალ გადახედვას გეგმავს, რაც, მისი თქმით, პროცესის ხელოვნურ გაჭიანურებაზე მიუთითებს.

კუპრაძის თქმით, ახალი საერთაშორისო საკონსულტაციო კომპანიის დაქირავება და ტვირთნაკადების პროგნოზის თავიდან გაკეთება ნიშნავს, რომ პროექტი "ნულიდან იწყება", ხოლო ჩინურ კომპანიასთან დაანონსებული შეთანხმება კვლავ გაურკვეველია.

კუპრაძემ დასძინა, რომ კოალიცია მზად არის ხელისუფლების ცვლილების თანავე პორტის მშენებლობის პროცესი ტრანსატლანტიკური ფინანსური ინსტიტუტების ჩართულობითა და სრული გამჭვირვალობით დააჩქაროს.

პოლიტიკოსმა პორტის პროექტთის ვითარებასთან დაკავშირებით ვრცელი განცხადება გააკეთა, რომელსაც უცვლელად გთავაზობთ:

"დღეს საზოგადოებას ვაცნობთ ახალ, მნიშვნელოვან დეტალებს ანაკლიის პორტისპროექტთან დაკავშირებით — დეტალებს, რომლებიც კიდევ ერთხელ ადასტურებს, რომ ქვეყნის ერთ-ერთი ყველაზე მნიშვნელოვანი სტრატეგიული პროექტიმძიმე კრიზისშია.

ოფიციალური დოკუმენტებით ირკვევა, რომ ხელისუფლება ანაკლიის პორტის უკვე არსებული გენერალური გეგმის — "მასტერპლანის" — ალტერნატივებზე მუშაობს.

ამისთვის გაფორმებულია ახალი კონტრაქტი საერთაშორისო საკონსულტაციო კომპანიასთან, რომლის მიზანიც არის არსებულიპროექტის გადახედვა, ახალი ვარიანტების შეთავაზება და ტვირთნაკადის პროგნოზის თავიდან გაკეთება

ეს რას ნიშნავს?

ეს ნიშნავს, რომ პროექტი, რომელზეც წლები საუბრობდნენ, აღარ მუშაობს.

ეს ნიშნავს, რომ ანაკლია არ შენდება — ანაკლიას ისევ "კლავენ"....

ყველაზე საგანგაშო კი ის არის, რომ თავად კონტრაქტშიც კი არ არის განმარტებული, რატომ გახდა საჭირო ამ მასშტაბის ცვლილება.

ანუ ხელისუფლება ვერ ან არ ამბობს სიმართლეს — რა ჩავარდა, რატომ ჩავარდა და ვისი პასუხისმგებლობაა ეს.

ამასთან, უკვე თითქმის ორი წელია, რაც ხელისუფლება საზოგადოებას ატყუებს.

2024 წელს გამოცხადდა, რომ ჩინურ სახელმწიფო კომპანიასთან საინვესტიციო შეთანხმება "უახლოეს დღეებში" გაფორმდებოდა.

დღეს კი ვხედავთ, რომ არც ხელშეკრულებაა, არც ინვესტორია და არც დასრულებული პროექტი.

თუ დღეს "მასტერპლანს" თავიდან წერ, ესე იგი პროექტი აჭიანურებ/დროს წელავ/აგდებ.

თუ ინვესტორთან ორი წელი ვერ შეთანხმდი, ესე იგი მოლაპარაკებები ჩაგივარდა.

და თუ ისევ "ანალიზზე" ხარ გადასული, ესე იგი ქვეყანა ისევ ნულიდან იწყებს. ეს არის ქართული ოცნების მართვის შედეგი. დაკარგული დრო, გაფლანგული შესაძლებლობები და გაურკვეველი მომავალი.

ჩვენ პირდაპირ ვამბობთ: ანაკლიის პროექტი ჩააგდეს.

ჩააგდეს პოლიტიკური გადაწყვეტილებით, რომელმაც ქვეყანა ჩამოაშორა დასავლურ პარტნიორებს და დღეს გვტოვებს გაურკვეველ, რისკიან და გაჭიანურებულ პროცესში.

ამ დროს, რეგიონში ვითარება სწრაფად იცვლება.

საერთაშორისო დონეზე უკვე იკვეთება ახალი გეოპოლიტიკური შესაძლებლობა — ტრანსკავკასიური სატრანზიტო დერეფნის განვითარება, რომელიც შეიძლება იქცეს XXI საუკუნის ერთ-ერთ მთავარ ეკონომიკურ არტერიად.

ამ პროცესში აქტიურად არიან ჩართული შეერთებული შტატები და დასავლური პარტნიორები.

ეს არის შესაძლებლობის ფანჯარა საქართველოსთვის — შანსი, დაბრუნდეს დიდ თამაშში და დაიკავოს საკუთარი ადგილი.

მაგრამ ამ "ღია ფანჯარას" სჭირდება გამოყენება.

სჭირდება მკაფიოარჩევანი.

სწორედ ამიტომ, ძლიერი საქართველო — ლელო აცხადებს:

ეს შანსი აღარ უნდადაიკარგოს.

ჩვენ გვაქვს მკაფიო გეგმა, თუ რაუნდა გაკეთდეს:

ანაკლიის პორტის პროექტი უნდა გამოცხადდეს ქვეყნის ნომერ პირველ ეროვნულ პრიორიტეტად.

პროექტში წამყვანი როლი უნდა მიენიჭოს ამერიკულ და ტრანსატლანტიკურ ფინანსურ ინსტიტუტებს, რათა უზრუნველყოფილი იყოს მისი სტაბილურობა, სანდოობა და უსაფრთხოება.

ანაკლიის პორტს უნდა მიენიჭოს ეროვნული მნიშვნელობის სტრატეგიული ობიექტის სტატუსი.

პროექტი უნდა იყოს სრულად გამჭვირვალე — ყველა ხელშეკრულება საჯარო,რათა აღარ განმეორდეს კულისური გარიგებები და შეცდომები.

და რაც მთავარია — ამ პროცესში არ უნდა იყოს ადგილი იმ ძალებისთვის, რომლებიც მოქმედებენ საქართველოს სტრატეგიული ინტერესების წინააღმდეგ.

ჩვენ მზად ვართ — ახლაც და ხელისუფლებაში მოსვლისთანავე — უზრუნველვყოთ ამ პროექტის სწრაფი და რეალური განხორციელება.

ანაკლია არ არის უბრალოდ პორტი.

ანაკლია არის საქართველოს ეკონომიკური, უსაფრთხოების და გეოპოლიტიკური მომავალი.

დღეს კიდევ ერთხელ დგას არჩევანი — განვითარება თუ გაჭიანურება, დასავლეთი თუ გაურკვევლობა, მომავალი თუ დაკარგული შანსები.

ძლიერი საქართველო — ლელო ამ არჩევანში დგას საქართველოს მომავალის მხარეს. ანაკლია სჭირდება ქვეყანას. ანაკლია სჭირდება ქართველ ხალხს. და ანაკლია აუცილებლად აშენდება", — განაცხადა იკრაკლი კუპრაძემ.