ბოლნისელი აქტივისტის, ნურადინ ნაბიევის განცხადებით, პოლიტიკური შეხედულებებისა და სამოქალაქო აქტივიზმის გამო, მას ქართული ოცნების წარმომადგენლები ფიზიკურად გაუსწორდნენ. "რადიო მარნეულის" ცნობით, მას თავის ტრავმა და ხუთი ნაკერი აქვს ტუჩზე და ბოლნისის ერთ-ერთ საავადმყოფოშია გადაყვანილი.

ნურადინი აღნიშნულ ფაქტს მის მიერ მედიკამენტების სიმწირისა და ფასების შესახებ გაკეთებულ განცხადებებსაც უკავშირებს. ამბობს, რომ გუშინ, 14 აპრილს, აღნიშნულ პრობლემასთან დაკავშირებით ვიდეომიმართვა გაავრცელა და სწორედ ამის შემდეგ დაესხნენ მას თავს. ნურადინ ნაბიევი მასზე განხორციელებულ თავდასხმაში ქართული ოცნების წარმომადგენლებსა და პარლამენტარ ზაურ დარგალს ადანაშაულებს.

"9 კაცი შემოვიდა. აღარ მახსოვს მაგათი სახეები. ამ დროს ჩაის სახლში ვმუშაობდი ბოლნისის მუნიციპალიტეტის სოფელ ფარიზში. სახელი მკითხეს, რა გქვიაო, მეპატრონე შენ ხარო და რომ ვუთხარი კი მეთქი მაშინვე ცხრავემ ერთად დამარტყა. ჩემი აზრით ეს ხალხი სპეციალურად მერიიდან მოაგზავნეს და ირანის მხარდამჭერებმაც. ნახევარი მერიიდან იქნებოდნენ და ნახევარი ირანის მხარდამჭერები. თავდამსხმელები პატარა ბავშვებიც იყვნენ, არასრულწლოვნები", — აცხადებს ნურადინ ნაბიევი

ნაბიევის განმარტებით, მას თავს რამდენიმე დღის წინაც დაესხნენ აიათოლა ალი ხამენეის შესახებ სოციალურ ქსელში გაკეთებული განცხადებების გამო, რამაც გარკვეული პირები გააღიზიანა და მას ვინმე ოთარ ბაირამოვი ფიზიკურად გაუსწორდა.

ცნობისთვის, ნურადინ ნაბიევი 2025 წლის ადგილობრივი თვითმმართველობის არჩევნებში მონაწილეობას პარტია ლელოს პროპორციული სიით იღებდა. ის აქტიურად საუბრობს ბოლნისის მუნიციპალიტეტში შექმნილ პრობლემებზე და ხშირად ავრცელებს ვიდეო და ფოტო მასალებს მუნიციპალიტეტის საჭიროებებთან დაკავშირებით.