კინოთეატრების მფლობელთა ყოველწლიურ ყრილობაზე ექსკლუზიურად აჩვენეს სოციალური ქსელის გაგრძელების, სოციალური ანგარიშსწორების ოფიციალური ტრეილერი, რომელშიც მთავარ როლებს ოსკარის მფლობელი მაიკი მედისონი (Anora), ჯერემი ალენ უაითი (The Bear), კომიკოსი ბილ ბარი და ოსკარის ნომინანტი ჯერემი სთრონგი (Succession) ასრულებენ.

The Social Reckoning-ის ქასთი

ფოტო: Getty Images

სიქველის წარდგენისას, Sony Pictures-ის აღმასრულებელმა დირექტორმა, სანფორდ პანიჩმა ფილმს თრილერი უწოდა: დავითისა და გოლიათის ბრძოლა, რომელიც იმ ქაოსს უპირისპირდება, რაც მარკ ზაკერბერგმა დათესა. ფილმი ტექნოლოგიური ვუნდერკინდის მიერ მსოფლიოს უდიდესი სოციალური პლატფორმის შექმნიდან თითქმის ორი ათწლეულის შემდეგ მოვლენებს ასახავს. სიუჟეტის ცენტრშია ახალგაზრდა ინჟინერი ფრენსის ჰაუგენი (მედისონი), რომელიც Wall Street Journal-ის რეპორტიორ ჯეფ ჰორვიცთან (უაითი) ერთად სახიფათო გზას გადის კორპორაციის ყველაზე გასაიდუმლოებული ინფორმაციის გასამჟღავნებლად.

"არ არსებობს სიცოცხლე, რომელსაც Facebook-ის ალგორითმი არ შეხებია და ამ გავლენამ ყველაფერი შეცვალა. ასე რომ, დადგა დრო, მეტი ვთქვათ", — განუცხადა ფილმის რეჟისორმა, აარონ სორკინმა ლას-ვეგასში შეკრებილ აუდიტორიას.

CinemaCon-ის სტუმრებისთვის ნაჩვენებ დაძაბულ ტრეილერში მედისონის გმირი დუმილს არღვევს. მიუხედავად მკაცრი კონფიდენციალურობის ხელშეკრულებებისა, ჰაუგენი ამჟღავნებს, რომ Facebook-ის ხელმძღვანელობა კარგად იყო ინფორმირებული მოზარდებზე პლატფორმის მავნე ზეგავლენის შესახებ, და ასევე შეგნებულად უწყობდა ხელს დეზინფორმაციის გავრცელებას, რამაც პოლიტიკური ძალადობა გამოიწვია. ფონად ჩანს ჯერემი სტრონგი, რომლის მოკლე წითური ვარცხნილობა და დახვეწილი აქცენტი მაყურებელს აგრძნობინებს, რომ ეკრანზე არა მხოლოდ ზაკერბერგია, არამედ ძლევამოსილი მოწინააღმდეგე ყველასთვის, ვინც სიმართლეს ეძებს.

ასევე ნახეთ: Meta-მ შეგნებულად დააზიანა ბავშვების მენტალური ჯანმრთელობა — ნაფიცი მსაჯულები

კომიკოსი ბილ ბარი ზაკერბერგის მთავარ მრჩეველს თამაშობს, რომელიც აღმასრულებელ დირექტორს პასუხისმგებლობას აკისრებს იმ "ცრუ ინფორმაციის ნაკადის გამო, რომელსაც ატმოსფეროში აფრქვევთ".

სთრონგის ზაკერბერგი კი ცივად პასუხობს: "როცა ვამბობ 'არას', ეს დებატების დასასრულია. მე აღარ ვარ ის ბიჭი, რომელიც ორი წლის წინ გამოვიდა საერთო საცხოვრებლიდან, ირგვლივ მიმოიხედე".

ფილმის პრემიერა 9 ოქტომბერს იგეგმება და მას უკვე უწინასწარმეტყველებენ წარმატებას დაჯილდოების სეზონზე. პროექტის პროდიუსერები, სორკინთან ერთად, ტოდ ბლეკი, პიტერ რაისი და სტიუარტ ბესერი არიან.

ამავე თემაზე: ჯერემი სთრონგის მარკ ზაკერბერგი სულ სხვანაირი იქნება