დღეს ბრიფინგზე შალვა პაპუაშვილიმა განაცხადა, რომ ასაკრძალ ოპოზიციური პარტიათა სიას ფედერალისტებიც დაემატება. მისი თქმით, გადაწყვეტილება ოპოზიციური ალიანსების გაერთიანებას უკავშირდება.

"იცით, რომ მას შემდეგ რაც 2026 წლის 2 მარტს რადიკალურმა ოპოზიციურმა ხელი მოაწერეს დეკლარაციას და შექმნეს ე.წ. ალიანსი, სადაც განაცხადეს, რომ ექნებათ საერთო სტრატეგიული მიზნები და მათ შორის, გაიზიარეს საერთო მიზნები, თქვეს რომ იმუშავებენ იმაზე, რომ მათი მიზანი არის კონსტიტუციის არაღიარება, კონსტიტუციური ინსტიტუტების არაღიარება, არჩევნებისთვის ძირის გამოთხრა და ზოგადად, დემოკრატიული პროცესის არაღიარება. მათ შორის, გაერთიანდნენ 4 ოქტომბრის ხელისუფლების დამხობის ორგანიზატორები. ჩვენ ვთქვით, რომ ეს იქნებოდა საფუძველი, რომ ჩვენი კონსტიტუციური სარჩელისთვის რომელიც საკონსტიტუციოშია შეტანილი, გადაგვეხედა. გამომდინარე იქედან რომ ახლა გავქვს ამ დეკლარაციით გაერთიანება რომელიც იზიარებს ამ მიზნებს.

ამიტომ, დღეს მივმართავთ საკონსტიტუციოს ახალი სარჩელით, ამავე დროს, გამოვითხოვთ ძველ სარჩელს, რომელიც გვქონდა ამ არაკონსტიტუციური პარტიების აკრძალვის მოთხოვნით გვქონდა შეტანილი, და მივმართავთ ახალი სარჩელით, რომელშიც გავზრდით ჩამონათვალს. კერძოდ, თუკი თავდაპირველ სარჩელში ეს იყო 3 პარტია — ნაციონალური მოძრაობა, კოალიცია ცვლილებისთვის და ლელო, ახალ სარჩელში ამ სამ პარტიასთან იქნება ფედერალისტური პარტია," — განაცხადა შალვა პაპუაშვილმა.

შეგახსენებთ, 2025 წლის 4 ნოემბერს საკონსტიტუციო სასამართლოს ვებგვერდზე ქართული ოცნების მიერ მომზადებული ოპოზიციური პარტიების აკრძალვის სარჩელი განათავსეს, რომელსაც მოსამართლე ვასილ როინიშვილი განიხილავს. სარჩელში 2003-2012 წელს გახმაურებული საქმეების ჩამონათვალია, მათ შორის "სერჟანტ როინ შავაძის მკვლელობის საქმე" — ვასილ როინიშვილი აღნიშნული საქმის ერთ-ერთი პროკურორი იყო.

საკონსტიტუციო სარჩელით ქართული ოცნება სამი პარტიის აკრძალვას მოითხოვდა:

  • ერთიანობა — ნაციონალური მოძრაობა;
  • კოალიცია ცვლილებისთვის გვარამია, მელია, გირჩი, დროა;
  • ძლიერი საქართველო — ლელო, ხალხისთვის, თავისუფლებისთვის.

თავდაპირველად სარჩელში ჩამოთვლილი იყო "მცირე პარტიებიც", რომელთა აკრძალვასაც ქართული ოცნება ამ ეტაპზე არ ითხოვდა იმ მიზეზით, რომ მათ "პოლიტიკაზე არსებითი გავლენა და საარჩევნო ბარიერის გადალახვის რეალური პერსპექტივა არ გააჩნიათ", მაგრამ მათი "არაკონსტიტუციურობის საკითხი დღის წესრიგში შეიძლება დადგეს მოგვიანებით, იმ შემთხვევაში, თუ ისინი პოლიტიკურ პროცესზე არსებით გავლენას შეიძენენ". ეს პარტიები იყო: ელენე ხოშტარია — დროა; გირჩი მეტი თავისუფლება; კი ევროპას — სტრატეგია აღმაშენებელი; ევროპული საქართველო — მოძრაობა თავისუფლებისთვის; ფედერალისტური პარტია; საქართველოს რესპუბლიკური პარტია; "და სხვა ფიქტიური, ერთკაციანი და მცირე პარტიები".