ბათუმის მუნიციპალიტეტის საკრებულოს წევრის, გიორგი ლომთათიძის ოჯახი ტენდერებით 5 მილიონამდე გამდიდრდა, ამასთან დაკავშირებით ინფორმაციას საერთაშორისო გამჭირვალობა საქართველო (TI) ავრცელებს.

შპს "კომპასი ჯ.კ"-ს თავდაპირველად გიორგი ლომთათიძის და ეკატერინე ლომთათიძე ფლობდა. მოგვიანებით მფლობელი გახდა დეპუტატის მამა, დამირ ლომთათიძე, რომელმაც 2019 წლის 18 თებერვალს კომპანიის 100% წილი უსასყიდლოდ გადასცა სიძეს — გიორგი ხელაძეს. გიორგი ხელაძე დღემდე კომპანიის ერთპიროვნული მფლობელი და დირექტორია.

კომპანიის მიერ ტენდერებიდან მიღებული თანხები მკვეთრად გაიზარდა მას შემდეგ, რაც გიორგი ლომთათიძე საკრებულოს წევრი გახდა:

  • 2019-2021 წლებში: გიორგი ლომთათიძის დეპუტატობამდე პერიოდში, კომპანიამ ტენდერებიდან 762 432 ლარი მიიღო.
  • 2021-2025 წლებში: დეპუტატობის პერიოდში, კომპანიამ მოიგო 14 ტენდერი, რომელთა ჯამურმა ღირებულებამ 3 848 985 ლარი შეადგინა.
  • ბოლო 7 წლის ჯამური შემოსავალი: 4 614 417 ლარი.

"1,084,272 ლარის ჯამური ღირებულების 3 ტენდერი (NAT260001302, NAT250016580 და NAT240017814) შპს "კომპასი ჯ.კ"-მ ბათუმის მუნიციპალიტეტის დაფუძნებული იურიდიული პირებისგან მიიღო. ამ იურიდიული პირების და, მთლიანად მუნიციპალიტეტის აღმასრულებელი ორგანოების, კონტროლი გიორგი ლომთათიძის, როგორც საკრებულოს წევრის ვალდებულებაა, რაც სერიოზულ კითხვებს აჩენს ინტერესთა კონფლიქტთან დაკავშირებით.

მოქმედი კანონმდებლობის დარღვევა და ინტერესთა კონფლიქტის ნათელი გამოხატულებაა ის ფაქტი, რომ შპს "კომპასი ჯ.კ"-მ ასევე მოიგო სსიპ "ბათუმის ბულვარის" მიერ გამოცხადებული 420,878 ლარის ჯამური ღირებულების 2 ტენდერი (NAT250001679და NAT230006457) და ამ დროს "ბათუმის ბულვარის" დირექტორის მოადგილე და სატენდერო კომისიის წევრი გიორგი ლომთათიძის მეუღლე, სოფიკო გუჯაბიძე იყო. მეტიც, სოფიკო გუჯაბიძემ, ორივე შემთხვევაში, შესაბამის დოკუმენტებზე ხელმოწერით დააფიქსირა პოზიცია, რომ მას და შპს "კომპასი ჯ.კ"-ს ინტერესთა კონფლიქტი არ გააჩნიათ. სოფიკო გუჯაბიძე 2015-2018 წლებში, აჭარის ავტონომიური რესპუბლიკის მთავრობის აპარატის მასმედიასა და საზოგადოებასთან ურთიერთობის დეპარტამენტის უფროსი იყო," —წერია "საერთაშორისო გამჭირვალობა საქართველოს" მიერ გავრცელებულ ინფორმაციაში.