ელექტროენერგიაზე ფასის ზრდას ოპოზიციონერი პოლიტიკოსი საბა ბუაძე სოციალურ ქსელში გამოეხმაურა. მისი განმარტებით, ფასის მომატება გასაკვირი არაა, რადგან "ენერგეტიკული სექტორი ჩვენს ქვეყანაში არათუ არ ვითარდება, არამედ ერთ-ერთი ყველაზე შავბნელი და კორუფციული სივრცეა". მისივე თქმით, ქვეყანაში საკმარისად არ ვითარდება ელექტროენერგიის გამომიშავების არც ერთი მიმართულება.

საბა ბუაძე ასევე წერს, რომ მხოლოდ 2026 წლის თებერვალში საქართველომ თითქმის 8 მილიონი დოლარის ღირებულების ელექტროენერგია იყიდა.

"დღეს ნარმანიამ ელექტროენერგიის მორიგი 5 თეთრიანი გაძვირების შესახებ გვამცნო.

რა იწვევს საქართველოში ელექტრო ენერგიის საფასურის გაზრდას?

1. ტოტალური კორუფცია;

2. უკიდურესი უცოდინრობა და ხედვის არარსებობა.

რა თქმა უნდა, ფასი მოიმატებს, როდესაც ენერგეტიკული სექტორი ჩვენს ქვეყანაში არათუ არ ვითარდება, არამედ ერთ-ერთი ყველაზე შავბნელი და კორუფციული სივრცეა.
ქვეყანაში საკმარისად არ ვითარდება ელექტროენერგიის გამომიშავების არც ერთი მიმართულება — გამოუყენებელია ჰიდრო-რესურსები, აუთვისებელია ქარის და მზის ენერგიის რესურსი, რამაც უნდა შეამციროს იმპორტზე დამოკიდებულება.

მინიმუმ სამი ჰესი მახსენდება, რომელთა მშენებლობაც არა მხოლოდ გაჩერდა, არამედ სახელმწიფოს დამატებით უდიდესი ფინანსური ზიანი მოუტანა — ესენია ნენსკრა, ხუდონი და ნამოხვანი. ამავდროულად თითებზე ჩამოსათვლელია ქარის და მზის სადგურების რაოდენობა, რომელიც ასე ძალიან ჭირდება ჩვენს ეკონომიკას — მხოლოდ 2026 წლის თებერვალში საქართველომ იყიდა თითქმის 8 მილიონი დოლარის ღირებულების ელექტროენერგია", — დაწერა საბა ბუაძემ.

შეგახსენებთ, ელექტროენერგიის ტარიფი თბილისსა და რეგიონებში 5-5 თეთრით იზრდება. მიღებული გადაწყვეტილება ყველა სექტორისთვის იმოქმედებს 2026 წლის 1-ელი აპრილიდან 2031 წლის 1-ელ იანვრამდე.