სომხეთის მმართველმა პარტიამ, სამოქალაქო ხელშეკრულებამ, მომავალ არჩევნებზე პრემიერმინისტრობის კანდიდატად ოფიციალურად ნიკოლ ფაშინიანი წარადგინა. ამის შესახებ ინფორმაციას Armenpress ავრცელებს.

ფაშინიანმა სოციალურ ქსელში გავრცელებულ განცხადებაში აღნიშნა, რომ მისმა პარტიამ შიდა კენჭისყრის ორი რაუნდი ჩაატარა და შედეგები უკვე შეჯამებულია. მან ასევე დასძინა, რომ დადგენილ ვადებში კენჭისყრის შედეგებთან დაკავშირებით არანაირი საჩივარი არ შესულა.

"მსურს მადლობა გადავუხადო ხმის დამთვლელი კომისიის ყველა წევრს, მისი თავმჯდომარის, აკობ არშაკიანის ხელმძღვანელობით, ფარული კენჭისყრის ორივე რაუნდის მაღალ დონეზე და, არსებითად, უნაკლოდ ორგანიზებისთვის. მადლობას ვუხდი ჩემს ყველა თანაპარტიელს ჩემს მიმართ კიდევ ერთხელ გამოხატული ნდობისთვის და იმ პატივისთვის, რომ მომეცა შესაძლებლობა, სათავეში ჩავუდგე პარტია სამოქალაქო ხელშეკრულების საარჩევნო სიას და ვიყო მისი პრემიერმინისტრობის კანდიდატი. მადლობას ვუხდი "სამოქალაქო ხელშეკრულების" საბჭოს პარტიის პოლიტიკური ტრადიციების ერთგულებისთვის და სომხეთის რესპუბლიკაში ახალი პოლიტიკური სტანდარტის დამკვიდრებისთვის. ყველანი მიყვარხართ", — დაწერა ფაშინიანმა.

შეგახსენებთ, სომხეთში საპარლამენტო არჩევნები 7 ივნისსააა დაგეგმილი და პროპორციული სისტემით ჩატარდება.

იმისთვის, რომ პარტიამ ერთპიროვნულად დააკომპლექტოს მთავრობა, მან ხმების უმრავლესობა უნდა მოიპოვოს, წინააღმდეგ შემთხვევაში საჭირო გახდება კოალიციის შექმნა.

ოპოზიციური ძალები (მათ შორის სომხეთი და მე მაქვს პატივი ბლოკები) საგარეო პოლიტიკური კურსის გამო მმართველ გუნდს აქტიურად აკრიტიკებენ. ჯერჯერობით ერთიანი ოპოზიციური კანდიდატის შესახებ ოფიციალური შეთანხმება არ არსებობს.