მოსკოვი თბილისთან ორმხრივი თანამშრომლობის განვითარებას გარკვეული პოლიტიკური უთანხმოებების მიუხედავადაც კი ხელს უწყობს, განაცხადა რუსეთის საგარეო საქმეთა სამინისტროს პრესსპიკერმა მარია ზახაროვამ. ამის შესახებ რუსული მედია წერს.

"ჩვენს ხალხებს უახლოესი ისტორიული კავშირები აკავშირებთ. ამის გათვალისწინებით, რიგ საკითხებზე ცნობილი პოლიტიკური უთანხმოების მიუხედავად, ჩვენ ორმხრივი თანამშრომლობის განვითარებას ვუწყობთ ხელს. როგორც ჩანს, ქართული მხარეც დაინტერესებულია რუსეთთან კონსტრუქციული ურთიერთობებით", — განაცხადა მან ბრიფინგზე.

ამავდროულად, ზახაროვამ აღნიშნა, რომ რუსეთი არ მოერიდება საქართველოსთან პოლიტიკურ დიალოგს, როდესაც თბილისი მზად იქნება.

"რუსეთი გულწრფელად კმაყოფილია, რომ ხალხთა შორის კონტაქტები და ეკონომიკური თანამშრომლობა აღმავალი ტრაექტორიით ვითარდება. ახლა, რაც შეეხება პოლიტიკურ დიალოგს, შემიძლია გავიმეორო: როდესაც თბილისი მზად იქნება, მოსკოვი არ მოერიდება არსებით დისკუსიებს", — თქვა ზახაროვამ. მისივე თქმით, თბილისი "იწყებს იმის გააზრებას, რომ საქართველოს კეთილდღეობის გასაღები არა დაპირისპირებაში, არამედ რუსეთთან თანამშრომლობაშია".

რუსეთთან დიპლომატიური ურთიერთობები ქართულმა მხარემ 2008 წლის აგვისტოს ომის შემდეგ გაწყვიტა. ამჟამად, რუსეთსა და საქართველოს შორის პოლიტიკური დიალოგი ჟენევის მოლაპარაკებების ფარგლებში მიმდინარეობს, ხოლო ჰუმანიტარული დიალოგი ორი ქვეყნის სპეციალური წარმომადგენლების შეხვედრების მეშვეობით ხორციელდება.