19 მარტს, Freedom House-მა 2025 წლის ანგარიში გამოაქვეყნა, რომლის თანახმადაც საქართველოში თავისუფლების ინდექსი ბოლო ერთ წლის განმავლობაში 4 ქულით შემცირდა. ორგანიზაციის განმარტებით, ევრაზიის რეგიონში თავისუფლების ინდექსის ყველაზე დიდი ვარდნა საქართველოში დაფიქსირდა.

ამ დროისთვის საქართველო 51-ე ადგილს იკავებს რეიტინგში და "ნაწილობრივ თავისუფალი" ქვეყნის სტატუსი აქვს.

Freedom House საქართველოში თავისუფლების ინდექსის დაცემის მიზეზად 2024 წლის ნოემბერ-დეკემბრის აქციებზე განვითარებულ მოვლენებს ასახელებს.

"საქართველოში, ფართომასშტაბიანი აქციები რომლებიც 2024 წელს დაიწყო, 2025 წლის განმავლობაშიც გაგრძელდა, პროტესტის მონაწილეები პოლიციის მხრიდან არაპროპორციულ ძალას და არასათანადო მოპყრობას აწყდებოდნენ. მმართველი პარტიის, ქართული ოცნების ოპონენტები ფიზიკურ ძალადობას, შევიწროებას და ახალ სამართლებრივ შეზღუდვებს განიცდიდნენ, რომლებიც მიზნად ისახავდა ოპოზიციური პარტიებისა და სამოქალაქო საზოგადოების მონაწილეობისთვის ხელის შეშლას," — ვკითხულობთ ანგარიშში.

ანგარიშში 2018 წლის საპრეზიდენტო არჩევნებთან დაკავშირებით ვკითხულობთ, რომ "საქართველოს 2018 წლის საპრეზიდენტო არჩევნების მეორე ტურის წინ, ბიძინა ივანიშვილის მიერ კონტროლირებულმა ფონდმა პირობა დადო, რომ 600,000-ზე მეტ ამომრჩეველს ვალს ჩამოაწერდა.

"მას შემდეგ, არჩევნებთან დაკავშირებული პრობლემები გაიზარდა — სახელმწიფო რესურსების ბოროტად გამოყენება, საარჩევნო უბნებზე ფიზიკური ზეწოლა, ძალადობა, პარტიების ბოიკოტი და ბიულეტენის საიდუმლოების დარღვევის საფრთხე," — ვკითხულობთ ანგარიშში.

ანგარიშში ასევე საუბარია განათლების სისტემაზე განხორციელებულ ზეწოლაზე და საპარლამენტო კომისიის შექმნაზე, რომლის დამსახურებითაც მრავალი ოპოზიციონერი პოლიტიკოსი ციხეში გაუშვეს.

"საქართველოში, ხელისუფლების კრიტიკული პროფესორები თანამდებობებიდან გაათავისუფლეს, რაც უფრო ფართო პროცესის ნაწილია — მმართველი პარტიის მცდელობა გააძლიეროს კონტროლი განათლების სისტემაზე. ასევე შეიქმნა საპარლამენტო კომისია ოპოზიციის წევრების გამოსაძიებლად; ვინც არ დაემორჩილა, დააკავეს და ზოგს პატიმრობაც მიუსაჯეს შეთითხნილი ბრალდებებით," — ვკითხულობთ განცხადებაში.