სპეციალურმა პენიტენციურმა სამსახურმა რადიო თავისულებას განუცხადა, რომ კოდექსში გაწერილი ნორმა "გამონაკლისად არ ცნობს" საქართველოს მე-3 პრეზიდენტის, მიხეილ სააკაშვილის მოთხოვნას კათალიკოს-პატრიარქის, ილია II-ის დაკრძალვას დაესწროს.

პენიტენციური კოდექსის 50-ე მუხლის თანახმად, მსჯავრდებულს საპატიმროს 2 დღემდე ვადით დატოვების უფლება აქვს, თუ არსებობს სარწმუნო ცნობა, რომ პატიმრის ახლო ნათესავი გარდაიცვალა.

სააკაშვილის ადვოკატის, გიორგი ჩალაძის განცახდებით, მისი დაცვის ქვეშ მყოფი ამ კრიტერიუმებს აკმაყოფილებს, რადგან ის საქართველოს მე-3 პრეზიდენტია, "პატრიარქის მეგობარია" და ასევე პატრიარქი მისი შვილის ნათლიაა. ჩალაძემ რადიო თავისუფლებას განუმარტა, რომ ეს ყველაფერი "ახლო ნათესაურ კავშირს გულისხმობს".

შეგახსენებთ, 18 მარტს, კათალიკოს-პატრიარქი საპატრიარქოდან სამების საკათედრო ტაძარში გადაასვენეს, სადაც სახალხო პანაშვიდები იმართება. სინოდის გადაწყვეტილებით, ილია II-ს 22 მარტს სიონის საკათედრო ტაძარში დაკრძალავენ.

მიმდინარე წლის 17 მარტს, 93 წლის ასაკში სრულიად საქართველოს კათოლიკოს-პატრიარქი ილია II გარდაიცვალა. 17 მარტის დილას, ილია II-ის ჯანმრთელობის მდგომარეობა გაუარესდა. როგორც კავკასიის მედიცინის ცენტრის დირექტორმა, სოფიო ასპანიძემ განაცხადა, პატრიარქი კლინიკაში კუჭიდან მასიური სისხლდენით შეიყვანეს და ჯანმრთელობის კრიტიკული მდგომარეობის გამო მართვით სუნთქვაზე იმყოფებოდა.

სრულიად საქართველოს კათოლიკოს-პატრიარქის, ილია II-ის გარდაცვალების გამო საქართველოში გლოვა გამოცხადდა. გლოვის დღეები 22 მარტის ჩათვლით გაგრძელდება.