პროევროპულ აქციებში მონაწილეობისთვის დაკავებული ზურა მენთეშაშვილი და დენის კულანინი ციხის ადმინისტრაციამ კარცერში გადაიყვანა. ადვოკატების ინფორმაციით, პატიმრები ანტისანიტარიულ გარემოში იმყოფებიან, სადაც ჰიგიენის ნორმებს ვერ იცავენ.

მენთეშაშვილის ადვოკატის, ჯანო ჭკადუას განმარტებით, მისი დაცვის ქვეშ მყოფმა არ იცის კარცერში გადაყვანის მიზეზი, მაგრამ ეჭვობს, რომ ეს შიმშილობის გამო მოხდა. მენთეშაშვილი 2025 წლის 1-ელ ნოემბერს დააკავეს და მას შემდეგ შიმშილობს.

"ზურა მენთეშაშვილი გადაყვანილია კარცერში, სადაც არაადამიანურ პირობებში იმყოფება. როგორც თვითონ განმარტა, არ აქვს პირსახოცი, არ აქვს ხელსაბანი საშუალებები, არ აქვს კბილის ჯაგრისი და ამასთანავე, საკანში არის ძალიან სიბინძურე, ვინაიდან არ აქვთ საშუალება, რომ საკანი დაასუფთაონ, ამის საშუალებას არ აძლევენ. ასევე, როგორც ამბობს, საკანში არის ტარაკნები, რაც დამატებით დისკომფორტს ქმნის და მათი არაერთი მოთხოვნის მიუხედავად, ის არ იქნა გადაყვანილი სხვა საკანში. როგორც თვითონ განმარტავს, ამ ყველაფრის მიზეზი არის ის, რომ მას რამდენჯერმე მოსთხოვეს შიმშილობის შეწყვეტა და მიუხედავად აღნიშნული მოთხოვნისა, შიმშილობა არ შეწყვიტა," — განაცხადა ადვოკატმა "ფორმულასთან" საუბრისას.

დენის კულანინის ადვოკატის, დიმიტრი ნოზაძის განცხადებით, მისი დაცვის ქვეშ მყოფი კარცერში ყოველგვარი ახსნა-განმარტების გარეშე გადაიყვანეს.

6 მარტით დათარიღებულ წერილში, დენის კულანინი წერს, რომ მას და ზურა მენთეშაშვილს ტელეფონის გამოყენება და ბანაობას აუკრძალეს და არც სარეცხის გარეცხვის უფლებას აძლევენ. პატიმრები საკანში სახალხო დამცველის შესვლას ითხოვენ.

"3.03.26 მე და ზურაბ მენთეშაშვილი გადაგვიყვანეს ჩვენი საკნიდან ყოველგვარი ახსნა-განმარტების გარეშე კარანტინში. უკვე სამი დღეა ვიმყოფებით კარანტინში (6.03) და გამოვაცხადეთ შიმშილობა მოთხოვნით, რომ ჩვენთან მოიყვანონ სახალხო დამცველი (ომბუდსმენი), რათა თავი დავიცვათ ციხის ადმინისტრაციის მოქმედებებისგან. უკვე სამი დღეა, ვითხოვთ აგვიხსნან ჩვენი კარანტინში ყოფნის მიზეზი.

ამ მომენტში გვამყოფებენ ტარაკნებს შორის, სრული ანტისანიტარიის პირობებში, ჭუჭყიანი ჭურჭლით. ოთახში სიგარეტის კვამლია და ვენტილაცია არ მუშაობს.
არ გვაძლევენ ჩვენს პირად ნივთებს, არ გვაძლევენ რვეულს და კალამს, ჩამოგვართვეს სასამართლოებისთვის საჭირო პირადი დოკუმენტები და პირადი წერილები.

ასევე გვიკრძალავენ რაიმეს ყიდვას ლარიოკში: სარეცხი საშუალებების, რვეულის ან კალმის.
გვძინავს ჭუჭყიან მატრასებზე და ბალიშებზე, თეთრეული არ გაიცემა. აგვიკრძალეს ტელეფონის გამოყენება, დილის გასეირნება და ბანაობა. ჭუჭყიანი ტანსაცმელი უკვე ერთი თვეა გასარეცხად არ გააქვთ. თავადაც არ გვაქვს არც ადგილი და არც საშუალება მათ გასარეცხად. არ გვაძლევენ წვდომას სოციალურ მუშაკთან.

3.03-დან მე და ზურაბმა დავიწყეთ წყლის შიმშილობა, თუმცა ციხის ადმინისტრაციამ არ მოიყვანა სოციალური მუშაკი ამის დასაფიქსირებლად და ამგვარად ცდილობს დაგვტოვოს ექიმების ზედამხედველობის გარეშე.

მე და ზურაბი სრულიად იზოლირებული ვართ ადვოკატებისა და საზოგადოებისგან, მიუხედავად იმისა, რომ ყველანაირად ვცდილობთ დაკავშირებას. არ ვიცით ეს წერილი რამდენად მალე მოაღწევს თქვენამდე, შესაძლოა იმ დროისთვის მდგომარეობა კიდევ უფრო გართულდეს, მაგრამ ჩვენ გავძლებთ!," — წერს კულანინი. (წყარო პუბლიკა)

დენის კულანინი პროევროპულ აქციაზე დააკავეს, მას პოლიციელის მანქანის მინის ჩამსხვრევა ედება ბრალად, რისთვისაც 2-წლიანი თავისუფლების აღკვეთა მიესაჯა.