საქართველოში ისრაელის საელჩო ირანის სულიერ ლიდერად მოჯთაბა ხამენეის დანიშვნას ეხმაურება. მათ მიერ სოციალურ ქსელში გავრცელებულ წერილში ვკითხულობთ, რომ "ჯთაბა ხამენეი უკვე მრავალი წელია იმ სისტემის ნაწილია, რომელიც ათწლეულების განმავლობაში პასუხისმგებელია რეპრესიებსა და ძალადობაზე".

"სახელი შეიცვალა, მაგრამ რეალობა — არა.

მოჯთაბა ხამენეი უკვე მრავალი წელია იმ სისტემის ნაწილია, რომელიც ათწლეულების განმავლობაში პასუხისმგებელია რეპრესიებსა და ძალადობაზე.

წლების განმავლობაში იგი მჭიდროდ იყო დაკავშირებული ისლამური რევოლუციის გვარდიის კორპუსთან (IRGC), პირდაპირ მონაწილეობდა ირანში სახალხო პროტესტების ჩახშობაში და ასოცირდებოდა გადაწყვეტილებებთან, რომლებიც რეგიონში მოქმედ სამხედრო პროქსი-ჯგუფებს უჭერდა მხარს.

ეს არის სწორედ ის სისტემა, რომელმაც ჩაახშო განსხვავებული აზრი საკუთარ ქვეყანაში, დააპატიმრა და სიკვდილით დასაჯა ოპონენტები და გააღვივა კონფლიქტები ირანის საზღვრებს მიღმაც.

ადამიანი, რომელიც ახლა ირანის რეჟიმს ხელმძღვანელობს, არის როგორც პროდუქტი, ასევე არქიტექტორი იმავე რეპრესიებისა და დესტაბილიზაციის მექანიზმისა, რომელმაც განსაზღვრა ალი ხამენეის ეპოქა", — წერია საელჩოს მიერ გავრცელებულ განცხადებაში.

ცნობისათვის, ირანის რელიგიურმა მოღვაწეებმა ქვეყნის უზენაეს ლიდერად დაღუპული უზენაესი ლიდერის, აიათოლა ალი ხამენეის ვაჟი მოჯტაბა ხამენეი 8 მარტს დანიშნეს.