საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე "რადიო თავისუფლებასთან" საუბრისას ამბობს, რომ ასტროლინგვისტიკა "არც მეცნიერებაა და არც რელიგია". ის არ გამორიცხავს, რომ ქუთაისის საერთაშორისო უნივერსიტეტში ასტროლინგვისტიკის სწავლების გადაწყვეტილებაზე მღვდელმთავრებთან შედგება მსჯელობა.

"ეზოთერიკა? — შეიძლება ასეც განისაზღვროს. სრულიად გაუგებარია ამის საჭიროება", — ამბობს ის რადიო თავისუფლებასთან.

შეგახსენებთ, რომ ოცნების ხელისუფლების მთავრობის გადაწყვეტილებით, ასტროლინგვისტიკა 2026 წლის სასწავლო გეგმით 20 სტუდენტს მიიღებს. ამ მიმართულებით სწავლა ქუთაისის საერთაშორისო უნივერსიტეტში იქნება შესაძლებელი, რომელიც ბიძინა ივანიშვილისა და მისი ოჯახის დაფინანსებით 6 წლის წინ გაიხსნა.

თეოლოგ ბექა მინდიაშვილის თქმით, "ეს ჰემატრია არის ალეკო ცინცაძის ირაციონალურ ფანტაზიებზე აგებული ე.წ. ქართული კაბალისტიკისა და ოკულტიზმის სუროგატი, რომელსაც საერთო არაფერი აქვს მეცნიერებასთან, რაციონალურობასა და ქრისტიანობასთან, პირიქით, ზუსტად შეიძლება ითქვას, რომ ეს არის რასიზმის შემცველი, სრულიად ანტიმართლმადიდებლური, სრულიად ანტიმეცნერული, ფსიქიკური ჯანმრთელობისთვის საშიში სწავლება და პრაქტიკა". მისივე თქმით, "სწორედ ამ ჰემატრიის, იგივე ასტროენათნეცნიერების კვოტები შემოიღეს და გაზარდეს იმ ბოროტების ავტორებმა, რომელსაც "რეფორმას" უწოდებენ. ქოცები კაბალისტიკასა და ოკულტიზმს ნერგავენ უნივერსიტეტში და სხვებისკენ იშვერენ თითს, მართლმადიდებლობას ებრძვიანო", — წერს მინდიაშვილი.