ოცნების პარლამენტმა ზოგად და უმაღლეს განათლების შესახებ კანონში ცვლილებები დაჩქარებული წესით, III მოსმენით მიიღო. უმაღლესი განათლების შესახებ კანონის გარდა, ცვლილებები შეეხო "განათლების ხარისხის განვითარების შესახებ" და "მეცნიერების, ტექნოლოგიებისა და მათი განვითარების შესახებ კანონს.

"უმაღლესი განათლების შესახებ" კანონში შეტანილი ცვლილებებით, შემოდის პრინციპი "ერთი ქალაქი — ერთი ფაკულტეტი", რაც გულისხმობს, რომ კონკრეტული ქალაქის სახელმწიფო უნივერსიტეტში ერთი კონკრეტული ფაკულტეტის სწავლება იქნება.

კანონში შეტანილი ცვლილებების მიხედვით საგრანტო პროგრამა გაუქმდა — 2026 წლის შემდეგი სასწავლო წლიდან სტუდენტები სახელმწიფო უნივერსიტეტებში უფასოდ ისწავლიან, ხოლო კერძო უნივერსიტეტებში სახელმწიფო დაფინანსების მოპოვებას ვეღარ შეძლებენ.

ცვლილებები ასევე შეეხო საბაკალავრო და სამაგასტრო სწავლის წლებს — 3+1+1 სწავლის მოდელის მიხედვით, 3 წელი დაეთმობა ბაკალავრიატს, ხოლო 1 წელი — მაგისტრატურას.

ასევე უმაღლესი საგანმანათლებლო დაწესებულების აკადემიური პერსონალის ჩამონათვალს დაემატება წამყვანი პროფესორის თანამდებობა. ასევე, დარეგულირდება აღნიშნული
თანამდებობის მქონე პირის აკადემიურ საბჭოში წევრობისა და დეკანის არჩევის პროცესში
მონაწილეობის უფლებები.

"ზოგადი განათლების შესახებ" კანონში შეტანილი ცვლილებებით, საქართველოში სრული ზოგადი განათლება არანაკლებ 11 და არაუმეტეს 12 წელი იქნება და მე-12 წელი ნებაყოფლობითი გახდება. დაწყებით საფეხურზე სკოლის მოსწავლე ვალდებული იქნება ატაროს ფორმა.

რაც შეეხება სკოლის დაწყების ასაკს, სკოლა იმ მოსწავლეებს მიიღებს, რომლებსაც 6 წელი 15 სექტემბრის ჩათვლით შეუსრულდათ.

ცვლილებების თანახმად, უქმდება სახელმძღვანელოებისთვის გრიფის მინიჭების წესიც — ვინაიდან თავად სამინისტრო შექმნის სასწავლო სასკოლო სახელმძღვანელოს, უზრუნველყოფს მის ბეჭდვასა და მოსწავლეებისთვის უსასყიდლოდ, დროებით სარგებლობაში გადაცემის მიზნით, შესაბამისი სკოლებისთვის მიწოდებას. სკოლას ექნება უფლება სასწავლო პროცესში სამინისტროს მიერ შექმნილი ან/და სამინისტროსთან შეთანხმებული სახელმძღვანელოები გამოიყენოს.

ცვლილებები შეეხო საჯარო სკოლებში მოსწავლეთა მიერ ელექტრონული საკომუნიკაციო საშუალებების (მათ შორის, მობილური ტელეფონის) გამოყენებასაც — ელექტრონული საკომუნიკაციო საშუალებების გამოყენების წესს სამინისტრო დაამტკიცებს.

მასწავლებელს, რომელიც სამსახურიდან მოსწავლის მიმართ განხორციელებული ძალადობის გამო გაათავისუფლეს ამ პოზიციაზე მუშაობა 3 წლით შეეზღუდება. ასევე, სამინისტრო ზოგადსაგანმანათლებლო დაწესებულების სტატუსის მოპოვების მიზნით დააფუძნებს საჯარო სამართლის იურიდიულ პირს ან კერძო სამართლის არასამეწარმეო იურიდიულ პირს და ას ზოგადი განათლების საშუალო საფეხურის ხანგრძლივობას ნებაყოფლობით XII კლასში მოსწავლეთა რეგისტრაციის შედეგების მიხედვით, ინდივიდუალურ-ადმინისტრაციული სამართლებრივი აქტით განუსაზღვრავს.

ცვლილებების თანახმად განათლების სამინისტრო ვალდებული იქნება ამ კანონით განსაზღვრული მიზნების განსახორციელებლად დააფუძნოს სამეწარმეო იურიდიული პირი ან/და არასამეწარმეო (არაკომერციული) იურიდიული პირი, რომელმაც მინისტრის გადაწყვეტილების საფუძველზე, აგრეთვე, შეიძლება განახორციელოს საქმიანობა ან პროექტი, რომელიც აუცილებელია საქართველოს კანონმდებლობით სამინისტროს სისტემისთვის განსაზღვრული სხვა მიზნების მისაღწევად.