ოცნების პარლამენტის თავმჯდომარის მოადგილე, ნინო წილოსანი ყოფილი პრემიერმინისტრის, ირაკლი ღარიბაშვილის დაკავებას გამოეხმაურა. მისი განმარტებით, ირაკლი ღარიბაშვილმა სწორი გადაწყვეტილება მიიღო, როდესაც გამოძიებასთან ითანამშრომლა. მისივე განმარტებით, უფრო მეტი "სიბინძურის ამოყრა ალბათ, არავისთვის არ იქნებოდა სასურველი."

"რა თქმა უნდა, ოჯახის წევრები იქნებიან ნაწყენები. ეს ბუნებრივია. მე ვფიქრობ, რომ ირაკლი ღარიბაშვილმა მიიღო სწორი გადაწყვეტილება, როდესაც ითანამშრომლა გამოძიებასთან. რა თქმა უნდა, ეს ყველა რისკები მან გათვალა. უფრო მეტი სიბინძურის ამოყრა ალბათ, არავისთვის არ იქნებოდა სასურველი, მათ შორის, სასამართლო პროცესები, ალბათ სწორედ ამას უზრუნველყოფს, ანუ უამრავი მოწმე იკითხება, უამრავი ფაქტი საჯაროვდება და ალბათ, ამ ყველაფრის გათვალისწინებით მიიღო მან გადაწყვეტილება... დეტალები თავისთავად უკვე მეტ სიბინძურეს ქმნის", — განაცხადა ოცნების პარლამენტის თავმჯდომარის მოადგილემ, ნინო წილოსანმა.

შეგახსენებთ, 2-გზის ყოფილი პრემიერმინისტრი, თავდაცვისა და შინაგან საქმეთა მინისტრი ირაკლი ღარიბაშვილი 12 იანვარს დააკავეს. პროკურატურის ინფორმაციით, უწყებამ ღარიბაშვილთან საპროცესო შეთანხმება გააფორმა და მას სასჯელის ზომად 5 წლით თავისუფლების აღკვეთა მიესაჯა.