ლევან ჯანგველაძის ოჯახის ადვოკატმა, ტარიელ კაკაბაძემ ყოფილი გენერალური პროკურორ ოთარ ფარცხალაძისთვის ბრალდების წაყენებაზე ინტერპრესნიუსთან გააკეთა კომენტარი. კაკაბაძეს განცხადებით, ოჯახი პროკურატურას საქმის სამართლიანად გამოძიებას და ფარცხალაძის დაკითხვას სთხოვდა. ადვოკატის თქმით, დღევანდელი გადაწყვეტილებით, ნამდვილად დადასტურდა ის ეჭვები და ვარაუდები, რაც ჯანგველაძის ოჯახს ჰქონდა.

"არაერთხელ მითქვამს, რომ რამდენიმე თვის განმავლობაში მიმდინარეობდა არა გამოძიება, არამედ საქმის ჩაფარცხვა. ვამბობდით, რომ ეს იყო შეკვეთილი მკვლელობა. მკვლელობას ჰყავდა ორგანიზატორი, შემსრულებლები და არაერთი პირი იყო ჩართული აღნიშნული დანაშაულის ჩადენაში. ამ გადაწყვეტილებით დადასტურდა, რომ ნამდვილად, ეს მკვლელობა იყო შეკვეთილი და მკვლელობას ჰყავდა ორგანიზატორი, პირი, რომელსაც ჰქონდა სერიოზული უთანხმოება და დაპირისპირება ლევან ჯანგველაძესთან.

რაც შეეხება ოთარ ფარცხალაძეს, აქამდე არაერთხელ გაგვიკრიტიკებია, პირადად მე, გამიკრიტიკებია პროკურატურა იმასთან დაკავშირებით, რომ ისინი არც კი იბარებდნენ გამოსაკითხად. მისი გამოკითხვის ოქმიც კი არ იდო მთელი ამ დროის განმავლობაში საქმეში მიუხედავად იმისა, რომ ძალიან ბევრი მტკიცებულება მიუთითებდა მის სავარაუდო მონაწილეობაზე ამ დანაშაულში.

დღევანდელი გადაწყვეტილებით, ნამდვილად დადასტურდა ის ეჭვები და ვარაუდები, რაზეც ჩვენ ვსაუბრობდით. ისინი გამართლებულია და ჩვენ სწორ ინფორმაციას ვაწვდიდით საზოგადოებას მთელი ამ დროის განმავლობაში," — განუცხადა ლევან ჯანგველაძის ოჯახის ადვოკატმა, ტარიელ კაკაბაძემ IPN-ს.

შსს-ს ცნობით, ბიზნესმენ ლევან ჯანგველაძის მკვლელობას ყოფილი გენერალური პროკურორი ოთარ ფარცხალაძე ხელმძღვანელობდა და მისი ლიკვიდაცია ძმებ მიქაძეებთან ერთად დაგეგმა. ფარცხალაძეს ლევან ჯანგველაძის მკვლელობის საქმეზე ბრალი წარედგინება დღეს წარედგინა.

ლევან ჯანგველაძის მკვლელობის საქმე

მკვლელობა 14 მარტს გვიან ღამით ვაკეში, ჭავჭავაძის გამზირზე მოხდა. მას შემდეგ, რაც ლევან ჯანგველაძე ახლობლის გასვენებიდან ბრუნდებოდა, გზის გადაკვეთისას გელა უძილაურმა მას ცეცხლი გაუხსნა. ბრმა ტყვიისგან გამვლელი ფეხში დაიჭრა. ამავე საქმეზე დანაშაულის იარაღის უკანონო გასაღების ბრალდებით სანდრო წივწივაძეა დაკავებულია.

მას ბრალად განზრახ მკვლელობისა და ცეცხლსასროლი იარაღის უკანონო შეძენა-შენახვა-ტარება ედებოდა. დანაშაული 15 წლამდე ვადით თავისუფლების აღკვეთას ითვალისწინებდა, თუმცა მოგვიანებით პროკურატურამ ბრალი განზრახ მკვლელობიდან შეკვეთით მკვლელობაზე გადააკვალიფიცირა. კანონიერი ქურდის ძმის, ლევან ჯანგველაძის მკვლელობის ბრალდებით დაკავებულმა გელა უძილაურმა ბრალდება სასამართლო პროცესზე აღიარა. უძილაურმა უარყო, რომ მას მკვლელობა დაუკვეთეს და ამბობს, რომ პირადი ანგარიშსწორების მიზნით "იძია შური" ლევან ჯანგველაძეზე.

2 ივნისს ტვ პირველმა გაავრცელა ინფორმაცია, რომ ანონიმური წყარო ლევან ჯანგველაძის მკვლელობის ორგანიზებაში საქართველოს ყოფილ მთავარ პროკურორს, ოთახ ფარცხალაძეს სდებს ბრალს.

შინაგან საქმეთა სამინისტროს საგანგებო ბრიფინგზე, თბილისის პოლიციის დეპარტამენტის დირექტორმა ვაჟა სირაძემ განაცხადა, რომ კანონიერი ქურდის ძმის, ლევან ჯანგველაძის მკვლელობის საქმეზე 3 პირი დააკავეს, ხოლო საზღვარგარეთ მყოფ 2 პირს ბრალი დაუსწრებლად წარედგინებათ. სირაძის განცხადებით, გამოძიებამ დაადგინა, რომ ძმებმა დავით და გიორგი მიქაძეებმა ბიზნესსაქმიანობასთან დაკავშირებულ და სხვადასხვა საკითხებზე დაპირისპირებულების მოტივით ლევან ჯანგველაძის შეკვეთილი მკვლელობის ორგანიზება მოახდინეს — მკვლელობის შესრულება გელა უძილაურს დაავალეს. მედიაში გავრცელებული ინფორმაციით, ძმები მიქაძეები კრიმინალურ სამყაროსთან და ოთარ ფირცხალაძესთან დაახლოებული პირები არიან.