გულწრფელად რომ ვთქვათ, სიტყვა "რუტინაზე" მაინცდამაინც სასიამოვნო ასოციაცია არ გვიჩნდება. რუტინა უფრო ხშირად რამე მოსაწყენთან, სპონტანურობის მტერთან, სიმკაცრესთან, დიდ ძალისხმევასთან და ერთფეროვნებასთან ასოცირდება.

არადა, მიუხედავად იმისა, ჩვენ რა წარმოდგენები და დამოკიდებულება გვაქვს მასთან, ჩვენს სხეულს ნაკლებად აინტერესებს — ჩვევები მოსწონს და სულ მცირე სტრუქტურა მაინც სჭირდება იმისთვის, რომ გამართულად იფუნქციონიროს.

ქვემოთ მოგიყვები, რატომ არის ჩვენი სხეული ყოველთვის სტაბილურობის მომხრე.

ფოტო: Freepik

სხეულის საათი

ჩვენს სხეულს თავისი შიდა საათი აქვს, რომელსაც ცირკადული რიტმი ჰქვია. ის არეგულირებს ყველაფერს — ძილს, საჭმლის მონელების დროს, ჰორმონების გამოყოფას და ა.შ. თუ ძილ-ღვიძილის დრო მუდმივად იცვლება და ხშირად იცვლება ის დროც, როდის ვიღებთ საკვებს — ამით საკუთარ სხეულს ვაბნევთ, რიტმი გვერღვევა და ხშირად ვართ დაღლილები, გვეცვლება ხასიათი და ზოგად სისუსტესაც ვგრძნობთ. რუტინის დაცვით კი პირიქით, ვეხმარებით სხეულს — საათი ჰარმონიულად, ჩვენი ორგანიზმი კი უკეთ მუშაობს.

ტვინის ენერგია

ყველა პატარა გადაწყვეტილებაზე — როდის დავიძინო, რა ვჭამო, გავისეირნო თუ არა, როდის და სად — ჩვენი ტვინი ენერგიას ხარჯავს, რაც გვღლის.

ფოტო: Pinterest

არადა, ამ ჩვევების რუტინად ქცევა, ავტომატიზაციის ერთგვარი საშუალებაა ჩვენი ორგანიზმისთვის. თითქოს, ავტოპილოტზე გადადის სხეული და ტვინსაც ნაკლები რესურსი ეხარჯება. შესაბამისად, მეტი დრო და ენერგია რჩება უფრო მნიშვნელოვანი საქმეებისთვის ან, თუნდაც, დასვენებით ტკბობისთვის.

ჯანსაღი ჩვევების საფუძველი

ჯანსაღი ქცევა რომ ჩვევად ვაქციოთ, მაგას რამხელა ძალისხმევა სჭირდება, კი გვახსოვს — წყლის რეგულარულად სმა, უკეთ კვება, ფიზიკური აქტივობა — რუტინა ამ პროცესის გამარტივებაშიც გვეხმარება. მუდმივობით, საკუთარ სხეულს ვეუბნებით, რომ ვზრუნავთ მასზე და ეს ზრუნვა უკანვე გვიბრუნდება.

ფოტო: Freepik

მარტივით დაიწყე — ყოველ დღე ერთი და იმავე დროს გაღვიძებით. ახალი ჩვევა არსებულს მიაბი — მაგალითად, ყოველ დილას ხუთწუთიანი გაწელვა ყავის დალევის შემდეგ აკეთე.და რაც მთავარია, შემწყნარებელი იყავით საკუთარი თავის მიმართ — თუ ერთ დღეს გეგმას ვერ შეასრულებ, არ დანებდე, მეორე დღეს დაუბრუნდი მას.

გახსოვდეთ, რუტინა სიმკაცრეს არ ნიშნავს.