2025 წლის საბავშვო ევროვიზია თბილისში საფრანგეთის გამარჯვებით დასრულდა. 11 წლის ლუ დელუზმა, სიმღერით Ce Monde, ჟიურისა და ტელემაყურებლისგან ჯამში 248 ქულა მიიღო და თავის ქვეყანას კონკურსზე მეოთხე გამარჯვება მოუტანა. ამ შედეგით საფრანგეთი ევროვიზია ჯუნიორის რეკორდსმენ საქართველოს გაუთანაბრდა, რომელსაც ასევე ოთხჯერ აქვს მოგებული ფესტივალი.

დელუზმა უმაღლესი, 152 ქულა დაიმსახურა ჟიურისგან. ექვსი ქვეყნის ჟიურიმ — ალბანეთმა, ხორვატიამ, კვიპროსმა, ნიდერლანდებმა, ჩრდილოეთ მაკედონიამ და სან-მარინომ — საფრანგეთის გამოსვლა მაქსიმალური 12 ქულით შეაფასა. რაც შეეხება ტელემაყურებლის შეფასებას, საფრანგეთს აქ მეორე ადგილი ერგო, ონლაინ ხმის მიცემით ყველაზე მეტი, 98 ქულა კი უკრაინამ მიიღო.

აი, მასპინძელი ქვეყანა კი საბოლოოდ მესამე პოზიციაზე აღმოჩნდა 176 ქულით. საქართველოს წელს ანიტა აბგარიანი წარადგენდა, სიმღერით Shine Like a Star. ანიტამ ჟიურისგან მეორე უმაღლესი შეფასება, 121 ქულა დაიმსახურა, ტელემაყურებლის ხმებით კი 55 ქულა ერგო და 18 ქვეყანას შორის მე-7 პოზიციაზე აღმოჩნდა.

ქვემოთ უფრო დეტალურად მოგიყვებით, რომელი ქვეყნებიდან რა შეფასება მიიღო საქართველომ და როგორ განაწილდა ჩვენი ქულები.

როგორი შეფასების სისტემა მოქმედებს საბავშვო ევროვიზიაზე: კონკურსზე ცალ-ცალკე, თანაბარი პროპორციით ითვლება ჟიურის ქულები და ტელემაყურებლის (ონლაინ ხმის მიცემის) ხმები. 18-ვე ქვეყანაში მუსიკოსებისგან დაკომპლექტებული ჟიური მონაწილეებს 1-7, 8, 10 და 12 ქულით აფასებს: საუკეთესოს უწერს 12 ქულას, მე-2 ადგილზე მყოფს 10-ს, მესამეზე — 8-ს და ა.შ. რაც შეეხება მაყურებელს, ის პროცესში მხოლოდ ონლაინ ხმის მიცემით მონაწილეობს. შესაბამისად, ჯერ განისაზღვრება, ჟიურის ჯამში მაქსიმუმ რამდენი ქულის დაწერა შეუძლია (წელს ეს რიცხვი 1 044 იყო), შემდეგ კი მიღებული ხმები პროპორციულ ქულებად ნაწილდება მონაწილეებზე.

ჟიურის ქულები საქართველოს

17 ქვეყნიდან, რომლებმაც საქართველოს გამოსვლა შეაფასეს, ანიტა ქულის გარეშე არცერთს არ დაუტოვებია. მეტიც, საქართველომ სამი მონაწილე ქვეყნის ჟიურისგან უმაღლესი შეფასება მიიღო.

• ირლანდიისგან, პოლონეთისგან და ესპანეთისგან — 12 ქულა
• ალბანეთისგან და პორტუგალიისგან — 10 ქულა
• სომხეთისგან, აზერბაიჯანისგან, მალტისგან და ნიდერლანდებისგან — 8 ქულა
• იტალიისგან და ჩრდილოეთ მაკედონიისგან — 7 ქულა
• კვიპროსისგან — 6 ქულა
• ხორვატიისგან — 5 ქულა
• საფრანგეთისგან, მონტენეგროსგან, სან-მარინოსგან და უკრაინისგან — 2 ქულა

ტელემაყურებლის ქულები საქართველოს

2017 წლიდან საბავშვო ევროვიზიაზე ხმის მიცემის წესი შეიცვალა. თუკი მანამდე მხოლოდ მონაწილე ქვეყნების ტელემაყურებელი აძლევდა ხმას სატელეფონო ზარით ან SMS-ით და არ შეეძლო, საკუთარი ქვეყნისთვის დაეჭირა მხარი, 2017 წლიდან პროცესმა ონლაინ სივრცეში გადაინაცვლა. ონლაინ ხმის მიცემით შესაძლებელია სამ ფავორიტს დაუჭირო მხარი, მათ შორის, საკუთარ ქვეყანას. კონკურსის ფანების ნაწილი ფიქრობს, რომ ეს დიდ და არასამართლიან უპირატესობას აძლევს მრავალრიცხოვან ქვეყნებს.

საბავშვო ევროვიზიის ორგანიზატორის, ევროპის მაუწყებელთა კავშირის (EBU) ცნობით, წლევანდელ კონკურსზე 2,5 მილიონი ხმა დაფიქსირდა 188 ქვეყნიდან. რადგან საქართველომ ტელემაყურებლისგან 55 ქულა მიიღო, შეგვიძლია ვიანგარიშოთ, რომ ხმების 5,27% გვერგო — დაახლოებით, 131 750 ხმა.

როგორ გადანაწილდა ქულები საქართველოდან

საბავშვო ევროვიზიის წესების თანახმად, ყველა მონაწილე ქვეყანას უნდა ჰყავდეს 5-წევრიანი ჟიური, სადაც სამი პროფესიონალი მუსიკოსი იქნება, ორი კი — ბავშვი 10-დან 15 წლამდე. ჟიურის თითოეული წევრი ცალკე აფასებს კონკურსანტებს, შემდეგ კი ხუთივეს შეფასება ჯამდება და შესაბამისად ნაწილდება ქულები ქვეყნიდან.

საქართველოს ჟიურიში წელს იყვნენ რომან რცხილაძე, მარიამ შენგელია, ქეთევან ჯავახიშვილი და პროექტ რანინას ორი მონაწილე: გიორგი შაშვიაშვილი და ანასტასია მასურაშვილი. ქართული ჟიურის შეფასება კი ასე გამოიყურება:

• 12 ქულა — სომხეთს
• 10 ქულა — საფრანგეთს
• 8 ქულა — პოლონეთს
• 7 ქულა — ესპანეთს
• 6 ქულა — უკრაინას
• 5 ქულა — ალბანეთს
• 4 ქულა — ჩრდილოეთ მაკედონიას
• 3 ქულა — პორტუგალიას
• 2 ქულა — სან-მარინოს
• 1 ქულა — ხორვატიას

ამით რიგით 23-ე საბავშვო ევროვიზია დასრულდა. ჯერჯერობით უცნობია, სად გადანაიცვალებს კონკურსი მომდევნო, 2026 წელს. ტრადიციულად, მასპინძლობას პირველს გამარჯვებულ საფრანგეთს შესთავაზებენ, სადაც ევროვიზია ჯუნიორი 2021 და 2023 წლებში უკვე ჩატარდა.

პირველმა არხმა 2026 წლის საბავშვო ევროვიზიაზე მონაწილეობა არაფორმალურად უკვე დაადასტურა და სექტემბერში დაიწყო მონაწილეების შერჩევა პროექტ რანინას ახალი სეზონისთვის, რომელმაც სწორედ საქართველოს მომდევნო წარმომადგენელი უნდა გამოავლინოს.