საახალწლო დეკორაციებსა და ღონისძიებებზე 2025 წელს 12,5 მლნ ლარზე მეტი დაიხარჯება. ამის შესახებ "ფლანგვის დეტექტორის" მიერ გამოქვეყნებულ კვლევაშია საუბარი.

ამ თანხიდან ყველაზე დიდი წილი თბილისზე მოდის, რომელმაც ამ მიზნისთვის ბიუჯეტიდან 8 მილიონ ლარზე მეტი გამოყო. მას მოსდევს ბათუმი 1,326 მლნ ლარით, ხოლო ჯამურად ხუთი თვითმმართველი ქალაქი საახალწლო მზადებაზე 10 მილიონ ლარზე მეტს ხარჯავს.

კვლევაში ნათქვამია, რომ საახალწლო ღონისძიებების მოსამზადებლად თბილისის მერიამ 2025 წლის 7 ნოემბერს გამოსცა ბრძანება, რომლის მიხედვითაც დაახლოებით 8,28 მლნ ლარის დახარჯვაა დაგეგმილი. თანხა მოიცავს როგორც მონტაჟისა და დემონტაჟის სამუშაოებს, ისე სხვა თანმდევ ხარჯებს და დაიფარება თბილისის მუნიციპალიტეტის 2025 და 2026 წლების ბიუჯეტის ასიგნებებიდან.

სახელმწიფო შესყიდვების პორტალზე გამოქვეყნებული სამი ტენდერის მიხედვით, ბათუმი საახალწლო გაფორმებასა და ღონისძიებებში 1,3 მილიონ ლარზე მეტს დახარჯავს. ბათუმის მერიის საქალაქო ინფრასტრუქტურისა და კეთილმოწყობის სამმართველომ პირველი ტენდერი 29 ოქტომბერს გამოაქვეყნა. მისი სავარაუდო ღირებულება 976 060 ლარია და მოიცავს ქალაქის გასაფორმებლად საახალწლო მანათობელი კონსტრუქციების, დეკორაციებისა და სხვადასხვა მოწყობილობის მონტაჟსა და შემდგომ დემონტაჟს.

რაც შეეხება რუსთავს, ამ ეტაპზე გამოცხადებული ტენდერების მიხედვით, ქალაქის მუნიციპალიტეტს საახალწლო მზადება დაახლოებით 474 795 ლარი დაუჯდება.
ფლანგვის დეტექტორის ცნობით, რუსთავისგან განსხვავებით, ქუთაისი საახალწლო სამზადისში თითქმის ორჯერ ნაკლებს ხარჯავს – ჯამში დაახლოებით 187 230 ლარს.

ფოტო: ფლანგვის დეტექტორი

"ფლანგვის დეტექტორის" მიერ შესწავლილი 25 მუნიციპალიტეტი საახალწლო ღონისძიებებისთვის ჯამში 2 567 242 ლარზე მეტს დახარჯავს.

სრული კვლევა ნახეთ აქ.