ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა დღეს გამართულ ბრიფინგზე თქვა, რომ აფხაზეთის ომში უგზო-უკვლოდ დაკარგულთა 25 ცხედარია იდენტიფიცირებული და თბილისში გადმოსვენებული.

სუბარის თქმით, ბოლო ერთ წელიწადში 91 ნეშტი მოიძიეს, ამ დროისათვის კი მათგან 25-ის იდენტიფიცირება მოხერხდა. იდენტიფიცირებულთა შორის არიან სოხუმის მერი გურამ გაბისკირიას, ასევე ირაკლი ალასანიას მამის, უშიშროების პოლკოვნიკის, მამია ალასანიას ცხედარი.

როგორც მინისტრმა თქვა, იდენტიფიცირებულნი არიან ის პირები, რომლებიც საქართველოს დამოუკიდებლობისთვის იბრძოდნენ. მან განსაკუთრებული მადლობა გადაუხადა წითელი ჯვრის საერთაშორისო საზოგადოებასა და აფხაზურ მხარეს პროცესში მონაწილეობისთვის.