კატალონიელმა პოპვარსკვლავმა როზალიამ ახალი სიმღერა Berghain გამოუშვა. ცნობილ ისლანდიელ მუსიკოსთან, ბიორკთან, და ამერიკელ ივ ტუმორთან ერთად ჩაწერილი ექსპერიმენტული კომპოზიცია პირველი სინგლია როზალიას ახალი ალბომიდან Lux, რომელიც 7 ნოემბერს გამოვა.

საკულტო ბერლინური კლუბით, ბერგჰაინით, შთაგონებული სიმღერა ელექტრონული და საორკესტრო მუსიკის ნაზავია და რელიგიური მოტივებითაა გაჯერებული. ამ განწყობას კიდევ უფრო ამძაფრებს კომპოზიციაში გაჟღერებული ორგანი და გუნდი. სიმღერის ტექსტში, ინგლისურის გარდა, ესპანურ და გერმანულ ენებსაც მოისმენთ.

Berghain-ის ვიდეოკლიპმა კი, რომელიც ბერლინსა და ბარსელონაშია გადაღებული, იუთუბზე პრემიერის პირველივე დღეს რამდენიმე მილიონი ნახვა მოაგროვა.

ახალი სიმღერით, როზალიამ თავისი კარიერის მორიგი ეტაპის დაწყებაც აღნიშნა. მისტიკური განწყობისა და საორკესტრო ჟღერადობის მქონე Berghain მკვეთრად განსხვავდება მუსიკოსის წინა ნამუშევრებისგან, განსაკუთრებით, ბოლო ალბომისგან Motomami (2022). რაც შეეხება ახალ, რიგით მე-4 სტუდიურ ალბომს Lux, ის ოთხ ნაწილად დაყოფილ 18 სიმღერას გააერთიანებს. ალბომის ჩაწერაში მონაწილეობდა ლონდონის სიმფონიური ორკესტრიც დანიელ ბიარნასონის დირიჟორობით.

გრემის ორი ჯილდოს მფლობელ როზალიას ყველა დროის ერთ-ერთ ყველაზე გავლენიან ესპანელ მომღერლად მიიჩნევენ. თავად მუსიკოსი კი თვლის, რომ თავის შემოქმედებაზე უდიდესი გავლენა მოახდინა ბიორკმა. ორი მუსიკოსის გზები აქამდეც გადაკვეთილა — 2023 წელს გამოვიდა ბიორკისა და როზალიას საერთო ნამუშევარი Oral, რომელიც ისლანდიაში თევზის ფერმერული მეურნეობის წინააღმდეგ საპროტესტო კამპანიის ფარგლებში ჩაიწერა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...