ევროკავშირის წარმომადგენლობამ ევროპის საბჭოში საქართველოში ადამიანის უფლებების მდგომარეობასთან დაკავშირებით განცხადებას ავრცელებს, რომელსაც ევროკავშირის 12 არაწევრი ქვეყანა შეუერთდა. ეს ქვეყნებია: ალბანეთი, ანდორა, ისლანდია, ლიხტენშტაინი, მოლდოვა, მონაკო, მონტენეგრო, ჩრდილოეთ მაკედონია, ნორვეგია, სან-მარინო, უკრაინა, გაერთიანებული სამეფო.

"ჩვენ შეშფოთებულნი ვართ საქართველოში ადამიანის უფლებების მდგომარეობითა და მიმდინარე დემოკრატიული უკუსვლით.

1-3 სექტემბერს 21 პირს წაუყენეს ბრალი ჯგუფური ძალადობის ორგანიზებაში ან მასში მონაწილეობაში, ნარკოტიკების უკანონო ფლობასა და სხეულის განზრახ დაზიანებაში, სასამართლო პროცესები კი კვლავ გრძელდება.

მიუხედავად იმისა, რომ ოპოზიციის ორი ლიდერი ახლახან შეიწყალეს, დანარჩენები კვლავ დაკავებულნი არიან და მშვიდობიან აქციის მონაწილეებზე ძალადობას აგრძელებენ.

საქართველოს მმართველმა პარტიამ პატივი უნდა სცეს შეკრებისა და გაერთიანების თავისუფლების უფლებას, გამოიძიოს სამართალდამცავი ორგანოების წარმომადგენლების მიერ ძალის გადაჭარბებული გამოყენების ყველა ბრალდება და შესაბამისი პირები პასუხისგებაში მისცეს. ჩვენ კიდევ ერთხელ ვადასტურებთ სასამართლო სისტემის დამოუკიდებლობის დაცვისა და სამართლიანი სასამართლო პროცესის უფლების უზრუნველყოფის აუცილებლობას.

ვიმეორებთ, რომ ფუნქციური სამოქალაქო საზოგადოება ნებისმიერი დემოკრატიული სისტემის უმნიშვნელოვანესი კომპონენტია, მოვუწოდებთ საქართველოს, უზრუნველყოს, რომ მისმა ენერგიულმა სამოქალაქო საზოგადოებამ შეძლოს შეზღუდვების გარეშე მუშაობა და აქტიურად, ინკლუზიურად და მნიშვნელოვნად ჩაერთოს პოლიტიკის შემუშავების პროცესში. მოვუწოდებთ საქართველოს ხელისუფლებას, გააუქმოს გადაწყვეტილება შვიდი დამოუკიდებელი სამოქალაქო საზოგადოების ორგანიზაციის საბანკო ანგარიშების დაყადაღების შესახებ. ჩვენ ასევე მოვუწოდებთ საქართველოს ხელისუფლებას, შეასრულოს ვენეციის კომისიის ყველა რეკომენდაცია.

ვწუხვართ, რომ საქართველომ დროულად არ მოიწვია ეუთო/ოდირის მისია ადგილობრივი თვითმმართველობის არჩევნებზე დასაკვირვებლად. ჩვენ ხაზს ვუსვამთ ევროკავშირის მზადყოფნას, მხარი დაუჭიროს ქართველი ხალხის ევროპულ მისწრაფებებს და ქვეყნის ევროკავშირში გაწევრების გზას, თუ საქართველოს ხელისუფლება შეცვლის ახლანდელ ქმედებებს," — ვკითხულობთ განცხადებაში.