ნიუ-იორკში აშშ-ს სახელმწიფო მდივნის, მარკო რუბიოს ინიციატივით გამართულ ტრანსატლანტიკურ ვახშამზე საქართველო არ მიიწვიეს. ინფორმაციას აშშ-ს სახელმწიფო დეპარტამენტი ავრცელებს.

ვახშამს მსოფლიოს 40 ქვეყნის წარმომადგენლები ესწრებოდნენ, მათ შორის აზერბაიჯანიდან და სომხეთიდან.

"სახელმწიფო მდივანმა მარკო რუბიომ 2025 წლის ტრანსატლანტიკურ ვახშამს უმასპინძლა ევროკავშირისა და NATO-ს წევრი ქვეყნების საგარეო საქმეთა მინისტრებთან, NATO-ს გენერალურ მდივან მარკ რუტესთან, ევროკავშირის უმაღლეს წარმომადგენელ კაია კალასთან და სომხეთის, აზერბაიჯანის, შვეიცარიისა და უკრაინის საგარეო საქმეთა მინისტრებთან. მდივანმა ხაზი გაუსვა ტრანსატლანტიკური პარტნიორობის მნიშვნელობას მშვიდობის შენარჩუნებისა და კეთილდღეობის მისაღწევად, NATO-ს წევრი ქვეყნების ისტორიულ ვალდებულებას, გაზარდონ თავდაცვის ხარჯები შეკავების გასაძლიერებლად და დიპლომატიური ჩართულობის მნიშვნელობას რუსეთ-უკრაინის ომის დასასრულებლად. მდივანმა ასევე ხაზი გაუსვა ჩინეთის მავნე გავლენის წინააღმდეგ ბრძოლის მნიშვნელობას; ერთობლივ თანამშრომლობას ახლო აღმოსავლეთში სტაბილურობის მისაღწევად, მათ შორის იმის უზრუნველყოფით, რომ ირანმა არასდროს შექმნას ან მიიღოს ბირთვული იარაღი; და პრეზიდენტის მიღწევას სომხეთისა და აზერბაიჯანის მდგრადი მშვიდობის გზაზე დაყენებაში", — წერია გავრცელებულ ინფორმაციაში.

ვახშამზე მიწვეული ქვეყნების სრული სია ასეთია: აშშ, პოლონეთი, უკრაინა, ალბანეთი, სომხეთი, ავსტრია, აზერბაიჯანი, ნიდერლანდები, მონტენეგრო, მალტა, ლუქსემბურგი, ლიეტუვა, ლატვიის, იტალია, ირლანდია, ისლანდია, უნგრეთი, საბერძნეთი, გერმანია, საფრანგეთი, ფინეთი, ესტონეთი, დანია, ჩეხეთი, კვიპროსი, ხორვატია, კანადა, ბულგარეთი, ბელგია, შვედეთი, შვეიცარია, თურქეთი, დიდი ბრიტანეთი, ჩრდილოეთ მაკედონია,
ნორვეგია, პორტუგალია, რუმინეთი, სლოვაკეთი, სლოვენია და ესპანეთი.