ოცნების პრემიერმინისტრი ირაკლი კობახიძე აცხადებს, რომ ნაციონალური მოძრაობის ხელისუფლების შესახებ წულუკიანის კომისიის დასკვნასთან დაკავშირებით საკონსტიტუციო სასამართლოს მიმართავენ იმისათვის, რომ "დადგინდეს სამართლებრივი ჭეშმარიტება".

"ჩვენი მიზანი იცით რაც არის – უნდა მომზადდე კონსტიტუციური სარჩელი ამ თემასთან დაკავშირებით. ჩვენ ვფიქრობთ, რომ ის პოლიტიკური პარტიები, რომლებიც იწოდებიან რადიკალურ ოპოზიციად, კოლექტიურ ნაცმოძრაობად, მთლიანობაში წარმოადგენენ საფრთხეს კონსტიტუციური წყობილებისთვის. ისინი როდესაც იყვნენ ხელისუფლებაში პირდაპირ უპირისპირდებოდნენ ქვეყნის კონსტიტუციურ წყობილებას და ახლაც როცა არიან ოპოზიციაში პირდაპირ უპირისპირდებიან ქვეყნის კონსტიტუციურ წყობილებას. ეს არის საკონსტიტუციო სასამართლოს საქმე. ჩვენ ვფიქრობთ, რომ უნდა მივმართოთ საქართველოს საკონსტიტუციო სასამართლოს იმისათვის რომ დადგინდეს სამართლებრივი ჭეშმარიტება ამ ყველაფერთან დაკავშირებით. არ შეიძლება ასეთმა ადამიანმა უცხოელმა აგენტებმა, გარე დაკვეთით მუდმივად შფოთვის რეჟიმში ამყოფონ ჩვენი ქვეყანა", — "ოცნების" პრემიერმინისტრი ირაკლი კობახიძე წულუკიანის კომისიის დასკვნაზე.