ამერიკის შეერთებული შტატების სახელმწიფო დეპარტამენტმა უკრაინისათვის 2 სამხედრო პაკეტის მიყიდვა დაამტკიცა. აშშ-ის თავდაცვის დეპარტამენტის თავდაცვის თანამშრომლობის სააგენტოს ინფორმაციით, პაკეტები Patriot-ის საჰაერო თავდაცვის სისტემების მომსახურებასთან დაკავშირებულ კომპონენტებსა და Starlink-ის ტერმინალების მხარდაჭერას მოიცავს.

სააგენტოს ცნობით, ორი პაკეტის საერთო ღირებულება 329.1 მილიონი დოლარია.

179.1 მილიონი დოლარის ღირებულების პაკეტი მოიცავს Patriot-ის საჰაერო თავდაცვის სისტემის სათადარიგო ნაწილებს და ითვალისწინებს ტექნიკურ მხარდაჭერას, პროგრამული უზრუნველყოფის განახლებას და კონტრაქტორი სპეციალისტების გადამზადებას.

სახელმწიფო დეპარტამენტმა უკრაინისთვის ასევე დაამტკიცა 150 მილიონი დოლარის ღირებულების Starlink-ის სატელიტური კომუნიკაციების სერვისებისა და მისი აღჭურვილობის მიყიდვა, რომელიც აშშ-ს მთავრობის, კონტრაქტორების საინჟინრო და ლოჯისტიკურ მხარდაჭერას ითვალისწინებს.

"შემოთავაზებული გაყიდვა გააძლიერებს უკრაინის უნარს, გაუმკლავდეს არსებულ და მომავალ საფრთხეებს," — აღნიშნავს აშშ-ის თავდაცვის დეპარტამენტის თავდაცვის თანამშრომლობის სააგენტო