"პროკურატურის მიხედვით, პირბადის ან სათვალის ყიდვა არის ტრეფიკინგზე, გაუპატიურებაზე, ყაჩაღობაზე ბევრად უფრო მძიმე დანაშაული და განზრახ მკვლელობას უტოლდება, ან აჭარბებს კიდეც", — იურისტი საბა ბრაჭველი პროკურატურის შუამდგომლობით თბილისის საქალაქო სასამართლოს მიერ 7 NGO-ს დაყადაღებას ეხმაურება.

"საქართველოს სისხლის სამართლის კოდექსის მიხედვით:

განზრახ მკვლელობა ისჯება თავისუფლების აღკვეთით 10-დან 15 წლამდე;

არასრულწლოვანის გაყიდვა (ტრეფიკინგი) ისჯება თავისუფლების აღკვეთით 8-დან 12 წლამდე;

ჯანმრთელობის განზრახ მძიმე დაზიანება ისჯება თავისუფლების აღკვეთით 4-დან 6 წლამდე;

ყაჩაღობა ისჯება თავისუფლების აღკვეთით 7-დან 10 წლამდე;

გაუპატიურება ისჯება თავისუფლების აღკვეთით 6-დან 8 წლამდე.

საქართველოს პროკურატურის მიხედვით:

სხვა ადამიანისთვის წყლის სათვალისა და პირბადის შეძენა ისჯება სსკ 318 (ხუთიდან ათ წლამდე) 319 (შვიდიდან თხუთმეტ წლამდე) და 321' (ათიდან თხუთმეტ წლამდე თავისუფლების აღკვეთით) მუხლებით.

ანუ: ადამიანის დახმარება — პირბადის ან სათვალის ყიდვა არის ტრეფიკინგზე, გაუპატიურებაზე, მძიმედ დაჭრაზე, ყაჩაღობაზე ბევრად უფრო მძიმე დანაშაული და პირის განზრახ მკვლელობას უტოლდება, ან აჭარბებს კიდეც", — წერს იურისტი.

ცნობისთვის, პროკურატურის ინფორმაციით, 27 აგვისტოს ყადაღა დაედო 7 არასამთავრობო ორგანიზაციების საბანკო ანგარიშებს, რითაც შეიზღუდა ფულადი სახსრების შემდგომი არამიზნობრივი განკარგვა.

NGO-ებს ყადაღა საბოტაჟის, დამამძიმებელ გარემოებაში საბოტაჟის მცდელობის, უცხოეთის ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების წინააღმდეგ მიმართული საქმიანობისთვის ფინანსების მობილიზების ფაქტზე პროკურატურაში მიმდინარე გამოძიების ფარგლებში დაედოთ.

პროკურატურის ცნობით, ამ არასამთავრობო ორგანიზაციების "ფინანსები გამოყენებული იქნა ისეთი აღჭურვილობის შესაძენად, როგორიც არის — სპეციალური აირწინაღები, დამცავი სათვალეები, პირბადეები, სახის დასაფარი ნიღბები, წიწაკის სპრეი და სხვა საშუალებები".

მეტი 7 NGO-ს დაყადაღებაზე: