TV პირველის ცნობით, "ქართუ ბანკი" სასამართლოს მიმართავს, რათა ტელეკომპანიას "ქართუ ბანკის" ივანიშვილის ან ოლიგარქის ბანკად მოხსენიება აეკრძალოს. სასარჩელო მოთხოვნაში ბანკი აღნიშნავს, რომ მათ ბიძინა ივანიშვილთან არანაირი კავშირი არ აქვთ.

აღნიშნულ ფაქტთან დაკავშირებით კომენტარი იურისტმა ირაკლი აბესაძემ გააკეთა და აღნიშნა, რომ სარჩელი ძალიან უცნაურია და ამ ნაბიჯით "ქართუ ბანკი" ივანიშვილის სახელს შეურაცხმყოფლის სტატუსს ანიჭებს.

"სარჩელი არის ძალიან უცნაური. უცნაური იმიტომ, რომ სიტყვისა და გამოხატვის შესახებ საქართველოს კანონიდან გამომდინარე, ცილისწამებად ითვლება მხოლოდ და მხოლოდ სახელის გამტეხი ცნობების გავრცელება. ანუ "ქართუ ბანკი" თვლის, რომ ბიძინა ივანიშვილის ბანკი, ეს სიტყვები სახელს უტეხს და რეპუტაციას ულახავს "ქართუ ბანკს" და თავისთავად, რა თქმა უნდა, საინტერესოა, რატომ შეიძლება, ბანკი თვლიდეს, რომ ბიძინა ივანიშვილთან მათი კავშირი მათთვის შეურაცხმყოფელი, რეპუტაციის შემბღალავი და სახელის გამტეხია. ეს, რა თქმა უნდა, აბსურდია ერთის მხრივ, მაგრამ მეორეს მხრივ, ცხადია, რომ ისინი ცდილობენ, მურუსიძის სასამართლოს მეშვეობით სცადონ გამიჯვნა ივანიშვილთან, იმიტომ, რომ ივანიშვილის სახელს, მაღალი ალბათობით, უკვე უკავშირდება ძალიან სერიოზული სანქციები. გამიჯვნის პარალელურად, ისინი ივანიშვილის სახელს შეურაცხმყოფლის სტატუსს ანიჭებენ, რაც, ალბათ, ივანიშვილისთვის, ერთის მხრივ, საწყენი და მართა სახელის გამტეხი უნდა იყოს, ამიტომ ნახევრად ხუმრობით ვიტყვი, მაგრამ ახლა ივანიშვილი უნდა უჩიოდეს თავის ბანკს, რომ შეურაცხყოფად გამოაცხადეს ბიძინა ივანიშვილის სახელი და გვარი", — ამბობს ირაკლი აბესაძე.