გენერალური პროკურატურა ტელეკომპანია "მთავარ არხში" და მის კონტრაქტორ გაყიდვების სახლში ტელეკომპანიის დირექტორის, გიორგი ქურდაძის საჩივრის საფუძველზე შევიდა. ამის შესახებ ინფორმაცია თავდაპირველად "მთავარმა არხმა" ვებგვერდსა და სოციალურ ქსელში გაავრცელა, შემდეგ კი მომხდარს გენერალური პროკურატურაც გამოეხმაურა.

უწყების ცნობით, მოსამართლის განჩინების საფუძველზე, ტელეკომპანია "მთავარ არხს" "ფინანსური დოკუმენტაციის გამოთხოვის მიზნით" მიმართეს. უწყების განმარტებით, გამოძიება დაწყებულია "საწარმოში ხელმძღვანელობითი უფლებამოსილების ბოროტად გამოყენების, წინასწარი შეთანხმებით ჯგუფის მიერ, იურიდიული პირის კუთვნილი თანხების მითვისება-გაფლანგვის და უკანონო შემოსავლის ლეგალიზაციის ფაქტებზე".

"საქართველოს გენერალურმა პროკურატურამ, მოსამართლის განჩინების საფუძველზე ტელეკომპანია "მთავარ არხს" ფინანსური დოკუმენტაციის გამოთხოვის მიზნით მიმართა, ამავე ტელეკომპანიის დირექტორის გიორგი ქურდაძის საჩივრის საფუძველზე დაწყებული გამოძიების ფარგლებში.

განჩინებები, საგამოძიებო მოქმედებების ფარგლებში მოსაპოვებელი დოკუმენტაციის და ელექტრონული ინფორმაციის მოძიების და შემდგომი გადმოცემის მიზნით, ოფიციალურად ჩაბარდა შპს "მთავარი არხი"-ს და კონტრაქტორი კომპანიის უფლებამოსილ წარმომადგენლებს და მათ დოკუმენტების გადმოსაცემად მიეცათ გონივრული ვადა.

საქართველოს პროკურატურაში გამოძიება დაწყებულია საწარმოში ხელმძღვანელობითი უფლებამოსილების ბოროტად გამოყენების, წინასწარი შეთანხმებით ჯგუფის მიერ, იურიდიული პირის კუთვნილი თანხების მითვისება-გაფლანგვის და უკანონო შემოსავლის ლეგალიზაციის ფაქტებზე," — ვკითხულობთ პროკურატურის მიერ გავრცელებულ განცხადებაში.

მანამდე, "მთავარმა არხმა" ვებგვერდზე გაავრცელა განცხადება, რომ გენერალური პროკურატურა ტელეკომპანიაში და მის კონტრაქტორ გაყიდვების სახლში შევიდა. "მთავარი არხის" განცხადებით, ფინანსურ ოპერაციებში არანაირი დანაშაული არ არის და "ზედაპირზეა ოქუაშვილის დირექტორის ბრალდებების აბსურდულობა".

"საქართველოს გენერალური პროკურატურა ტელეკომპანია "მთავარ არხში" და მის კონტრაქტორ გაყიდვების სახლში შევიდა. პროკურატურამ მოითხოვა არხთან დაკავშირებული ფინანსური დოკუმენტაციის სრულად ამოღება. შესაბამისი განჩინება ტელეკომპანიას და გაყიდვების სახლს დღეს გადაეცა.

გამოძიება დაწყებულია "მთავარი არხის" ერთ-ერთი დამფუძნებლის, ზაზა ოქუაშვილის მიერ დანიშნული დირექტორის, გოგი ქურდაძის საჩივრის საფუძველზე, რომელიც ფინანსურ დარღვევებში ადანაშაულებს მენეჯმეჯმენტს და არხის თანადამფუძნებლებს.

როგორც ჯერ კიდევ გასული წლის შემოდგომაზე ვაცხადებდით, ზაზა ოქუაშვილი ყალბ და უსაფუძვლო ბრალდებებს უყენებდა არხის მენეჯმენტსა და თანადამფუძნებლებს და ამით ემსახურებოდა რუსული რეჟიმის ინტერესებს.

სამწუხაროდ, ქართულმა ოცნებამ მოახერხა მიზნის მიღწევა და ზაზა ოქუაშვილის ხელით დახურა ქვეყნის მთავარი კრიტიკული არხი. თუმცა, როგორც ჩანს, "მთავარ არხზე" ზეწოლა ამით არ ამოიწურა და რეჟიმი ისევ ოქუაშვილის ცილისწამების საფუძველზე ცდილობს კომპანიის მენეჯმენტსა და სხვა დამფუძნებლებზე ანგარიშსწორებას.

"მთავარი არხის" ფინანსურ ოპერაციებში არანაირი დანაშაული არ არის და მიუკერძოებელი პროკურატურა ქურდაძის საჩივარზე გამოძიებასაც კი არ დაიწყებდა, ვინაიდან ზედაპირზეა ოქუაშვილის დირექტორის ბრალდებების აბსურდულობა. თუმცა ყველას გვესმის, რომ “ქართული ოცნება” მომართულია არა სიმართლის დადგენისკენ, არამედ საკუთარი პოლიტიკური მიზნების შესრულებისკენ" — ვკითხულობთ "მთავარი არხის" განცხადებაში.

"მთავარი არხი" ეთერში 2019 წლის 9 სექტემბერს გავიდა. ტელეკომპანია "რუსთავი 2-დან" წამოსულმა გუნდმა 19 დღეში დააფუძნა. არხმა მაუწყებლობა 2025 წლის 1-ელ მაისს შეწყვიტა. ტელეკომპანიის განცხადებით, არხის ერთ-ერთი დამფუძნებელი ზაზა ოქუაშვილი მიზანმიმართულად ბლოკავდა მათთვის სასიცოცხლოდ აუცილებელ ტრანზაქციებს და მან ტელევიზია დახურვამდე მიიყვანა. "მთავარ არხში" ამბობენ, რომ ტელეკომპანია ბიძინა ივანიშვილმა ზაზა ოქუაშვილის ხელით დახურა.

მეტი "მთავარი არხი" შესახებ: