Financial Times წყაროზე დაყრდნობით წერს, რომ დონალდ ტრამპმა პირად საუბარში უკრაინის პრეზიდენტ ვოლოდიმირ ზელენსკის მოუწოდა გაეძლიერებინა დარტყმები რუსეთის სიღრმეში. გამოცემა წერს, რომ ტრამპმა ზელენსკის ჰკითხა, შეეძლო თუ არა უკრაინას მოსკოვისა და სანქტ-პეტერბურგისთვის დაერტყა.

"ვოლოდიმირ, შეგიძლია მოსკოვს დაარტყა? შეგიძლია სანქტ-პეტერბურგსაც დაარტყა?" — ჰკითხა ტრამპმა უკრაინის ლიდერს 4 ივლისს გამართული სატელეფონო საუბრის დროს.

გამოცემა წერს, რომ ზელენსკიმ უპასუხა: "აბსოლუტურად. შეგვიძლია, თუ იარაღს მოგვაწვდით".

Financial Times-ის ცნობით, მან პრეზიდენტ ზელენსკის ჰკითხა, შეუძლია თუ არა უკრაინულ სამხედროებს მოსკოვისა და სანქტ-პეტერბურგის დარტყმა, რათა "მათ ტკივილი იგრძნონ".

ამ სატელეფონო საუბრის შესახებ ინფორმირებული ორი პირის თქმით, ტრამპი იმედოვნებს, რომ ეს კრემლს მოლაპარაკებების მაგიდასთან დაჯდომას აიძულებს.

მანამდე მსგავსი ინფორმაცია გაავრცელა Washington Post-მა. მათ ცნობით, გასულ კვირას აშშ-ის პრეზიდენტმა დონალდ ტრამპმა უკრაინის ლიდერ ვოლოდიმირ ზელენსკის ჰკითხა, თუ რატომ არ დაარტყა უკრაინის შეიარაღებულმა ძალებმა მოსკოვს, რაზეც მან უპასუხა, რომ შეეძლო ამის გაკეთება, კიევს რომ ამერიკული იარაღი მიეღო. ამის შესახებ The Washington Post-ის (WP) მიმომხილველმა დევიდ იგნატიუსმა დაწერა.

WP-ს ცნობით, ტრამპმა ზელენსკის უთხრა, რომ აუცილებელი იყო ზეწოლის გაზრდა "არა მხოლოდ მოსკოვზე, არამედ სანქტ-პეტერბურგზეც".

იგნატიუსის თქმით, აშშ-ის პრეზიდენტმა რუსეთის მიმართ თავისი პოზიცია სამი მიზეზის გამო გაამკაცრა. ჟურნალისტმა აღნიშნა, რომ ტრამპმა იგრძნო, რომ რუსეთის პრეზიდენტი ვლადიმერ პუტინი მას უპატივცემულოდ ეპყრობოდა უკრაინაში ცეცხლის შეწყვეტის შესახებ მოწოდებების იგნორირებით.

მეორეც, ამერიკელმა ლიდერმა დაინახა ირანზე B-2 ბომბდამშენებისა და Tomahawk-ის რაკეტების ეფექტურობა. გარდა ამისა, ტრამპი დარწმუნებულია, რომ პუტინი უკრაინულ მხარესთან მოლაპარაკებას „მხოლოდ ძლიერი დარტყმების საფრთხის” არსებობის შემდეგ გამართავს.

14 ივლისს NATO-ს გენერალურ მდივან მარკ რუტესთან ერთობლივ პრესკონფერენციაზე ტრამპმა განაცხადა, რომ თუ უკრაინასთან ცეცხლის შეწყვეტის შეთანხმება 50 დღის განმავლობაში არ იქნება მიღწეული, რუსეთს და მის სავაჭრო პარტნიორებს "ძალიან მკაცრი ტარიფები" დაეკისრება.

მან ასევე განაცხადა, რომ აშშ "აპირებს უმაღლესი დონის იარაღის დამზადებას" და მის გაგზავნას ნატოში, რომლის ხარჯებსაც ევროკავშირი დაფარავს.

რუტემ დასძინა, რომ შეთანხმების მეშვეობით უკრაინას შეუძლია "ძალიან დიდი რაოდენობით სამხედრო აღჭურვილობის" შეძენა საჰაერო თავდაცვისთვის, რაკეტებისა და საბრძოლო მასალისთვის.

ეს ამბავი გავრცელდა იმ ცნობების ფონზე, რომ აშშ-ის პრეზიდენტი "ძალიან უკმაყოფილოა" რუსეთით და პრეზიდენტ ვლადიმერ პუტინის ქმედებებით უკრაინის მიმართ.