უკრაინის მხარეს მებრძოლ ქართველ მებრძოლ გელა ერაძეს დაუსწრებლად 14 წლით თავისუფლების აღკვეთა მიესაჯა. ამის შესახებ ინფორმაციას, რუსეთის საგამოძიებო კომიტეტზე დაყრდნობით, რუსული მედია ავრცელებს.

"რუსეთის საგამოძიებო კომიტეტის მთავარი საგამოძიებო დეპარტამენტის მიერ შეგროვდა მტკიცებულებები, რომლებიც ამხელს საქართველოს მოქალაქეს გელა ერაძეს, როგორც დაქირავებულს, შეიარაღებულ კონფლიქტში მონაწილეობაში. სასამართლოს გადაწყვეტილებით, ის დაუსწრებლად იქნა ცნობილი დამნაშავედ რუსეთის სისხლის სამართლის კოდექსის 359-ე მუხლის მე-3 ნაწილის საფუძველზე... სასამართლოს მიერ ერაძეს დაუსწრებლად მიესაჯა 14 წლით თავისუფლების აღკვეთა მკაცრი რეჟიმის კოლონიაში მოხდით", — ნათქვამია განცხადებაში.

რუსული მედია წერს, რომ გამოძიების მიხედვით, 2022 წლის დასაწყისში ერაძე ნებაყოფლობით შეუერთდა უკრაინის შეიარაღებულ ძალებს დაქირავებული მებრძოლის სტატუსით, გაიარა სამხედრო წვრთნა და შეისწავლა საბრძოლო იარაღის გამოყენება, რაც აუცილებელია შეიარაღებულ კონფლიქტში მონაწილეობისათვის. ხაზგასმულია, რომ ერაძე ფულადი ანაზღაურების სანაცვლოდ მონაწილეობდა საბრძოლო მოქმედებებში ე.წ. "დონეცკისა და ლუგანსკის სახალხო რესპუბლიკების" ძალოვანი სტრუქტურების წარმომადგენლებისა და რუსეთის შეიარაღებული ძალების სამხედრო მოსამსახურეების წინააღმდეგ.