ე.წ. ციანიდის საქმეზე გასამართლებული დეკანოზი გიორგი მამალაძე ამბობს, რომ საქმის პროკურორი მასზე ფსიქოლოგიურად ძალადობდა და პატრიარქის მკვლელობის მომზადების აღიარებასა და საიდუმლო ინფორმაციის მიწოდებას ითხოვდა. დღეს, 21 სექტემბერს TV პირველმა აუდიოჩანაწერი გაავრცელა და აღნიშნა, რომ ხმა დეკანოზ გიორგი მამალაძეს ეკუთვნის და სასამართლო სხდომაზეა ჩაწერილი.

"მიუხედავად ბრალისა, რომლიც შორენა თეთრუაშვილის მკვლელობის მომზადებას გულისხმობდა, პროკურორი ჯარჯი წიკლაური, ჩემი ადვოკატის თანდასწრებით, პატრიარქის მკვლელობის მომზადების აღიარებას ითხოვდა. ასევე ითხოვდა პროკურატურისთვის მიგვეწოდებინა ის მთავარი საიდუმლოება საპატრიარქოსი, რითაც ზოგიერთი ადამიანის მიერ მოხდებოდა პატრიარქისა და ზოგიერთი იერარქიის შანტაჟი", - ამბობდა დეკანოზი.

აუდიოჩანაწერში ისმის გიორგი მამალაძის ნათქვამი, რომ მას თავისუფლების სანაცვლოდ პროკურატურაში მეუფე დიმიტრისა და საპატრიარქოს დაცვის მაშინდელი უფროსის, სოსო ოხანაშვილის თანამონაწილეობის აღიარება მოსთხოვეს.

გუშინ, 20 სექტემბერს ტელეკომპანია რუსთავი 2-მა ე.წ. ციანიდის დახურული საქმიდან რამდენიმე საიდუმლო მასალა გაავრცელა, მათ შორისაა სასამართლოზე დეკანოზ გიორგი მამალაძის დასკვნითი სიტყვა.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

5 სექტემბერს დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.