ქართული ოცნების პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა, რომ "დედის გინება ნებისმიერი ფორმით ყველასთვის არის შეურაცხმყოფელია" და ამისთვის ადამიანებმა სამართლებრივად პასუხი უნდა აგონ.

"ერთი ადამიანი მეორეს დედას რომ აგინებს, არის თუ არა ეს შეურაცხყოფა? საქართველოში, სადაც დედის კულტი გვაქვს და ყველაფერი დედასთან ასოცირებული არის წმინდათა წმინდა. ერთი ადამიანი მეორე ადამიანს დედას რომ შეაგინებს, ეს არის თუ არა შეურაცხყოფა? და აქვს ამას მნიშვნელობა, თვალებში ჩახედავს და ისე შეაგინებს, თუ საჯაროდ, მაგალითად, ტელევიზიით გამოვა და იქ აიმყრალებს პირს, [...] ან ადგება და პოსტს დაწერს თუნდაც და საჯაროდ, ყველას დასანახად, ყველას გასაგონად, ისე, რომ ამ ადამიანთან მისვლის შესაძლებლობა და მისვლის სურვილი არ აქვს, ასე აგინებს.

რა თქმა უნდა, დედის გინება ნებისმიერი ფორმით ყველასთვის არის შეურაცხმყოფელი და ადამიანმა უნდა იგრძნობს პასუხისმგებლობა — როდესაც სხვა ადამიანს შეურაცხყოფას მიაყენებს, მის მიმართ კანონით გათვალისწინებული იქნება შესაბამისი ზომები," — თქვა არჩილ გორდულაძემ.

შეგახსენებთ, 6 ივნისს, ქართული ოცნების დეპუტატმა, ირაკლი კირცხალიამ ბრიფინგზე განაცხადა, რომ ფრაქციამ სამართლებრივი დავა დაიწყო და შსს-ში საჩივარი შეიტანა იმ პირებისადმი, რომლებმაც პარტიის წევრებისადმი "შეურაცხმყოფელი ქმედებები განახორციელეს".

შემდეგ, ოცნების დეპუტატმა დასძინა, რომ ეს გადაწყვეტილება არამხოლოდ საჯარო სივრცეებში მომხდარ ინციდენტებს, არამედ სოციალურ ქსელებში პარტიის კრიტიკის შემცველ განცხადებების ავტორებსაც შეეხებათ. კირცხალიამ ჟურნალისტებს არ უპასუხა კითხვაზე, თუ რამდენ პიროვნებას უჩივიან.