უნგრეთის პრემიერმინისტრმა, ვიქტორ ორბანმა გააზიარა ვიდეო, რომელიც დონალდ ტრამპმა კონსერვატიული პოლიტიკური მოქმედების კონფერენციაზე გამოაგზავნა.

ორბანმა ვიდეო ფეისბუქის საკუთარ გვერდზე გამოაქვეყნა.

ამერიკის პრეზიდენტმა მიულოცა უნგრეთს კონფერენციის ორგანიზება, შეაქო თავად ორბანი და ხაზი გაუსვა კონსერვატიული ღირებულებების მხარდაჭერის მნიშვნელობას.

"მინდა მივულოცო მიკლოშ ზანტოს და მეტ შლაპს ფანტასტიკური სამუშაო, რომელსაც ისინი ასრულებენ CPAC უნგრეთის ორგანიზებით. თქვენ იცით, რას ნიშნავს ჩემთვის უნგრეთი და ასევე იცით, რას ნიშნავს CPAC ჩემთვის. მე ორივეს დიდ პატივს ვცემ და მიყვარს. ასევე, მინდა განსაკუთრებული პატივისცემა გამოვხატო უნგრეთის ლიდერის, ვიქტორ ორბანის მიმართ, რომელიც შესანიშნავი ადამიანია და მას ყველა აფასებს. ის განსაკუთრებული ადამიანია და ბრწყინვალე სამუშაოს ასრულებს. რაც შეეხება CPAC-ს, როგორც ორგანიზაციას, მას მთელ მსოფლიოში პატივს სცემე", — თქვა ტრამპმა.

ვიქტორ ორბანმა ვიდეოს ასე უპასუხა: "თუ ტრამპი ჩვენთანაა, ვინ არის ჩვენს წინააღმდეგ?"

18 მარტს უნგრეთის პარლამენტმა მიიღო კანონპროექტი ბუდაპეშტის პრაიდის აკრძალვის შესახებ. კანონის თანახმად, აკრძალულია ღონისძიებები, რომლებიც ხელს უწყობს "ჰომოსექსუალობას' და "გენდერის შეცვლას".

ეს ნაბიჯი უნგრეთის პრემიერმინისტრ ვიქტორ ორბანისა და მისი პარტიის, "ფიდესის", ანტი ლგბტ პოლიტიკაში ჯდება.