მოსამართლე ნინო სახელაშვილმა ბათუმელების და ნეტგაზეთის დირექტორისა და დამფუძნებლის, მზია ამაღლობელის სასამართლო პროცესიდან ტელეკომპანია ფორმულას ჟურნალისტი და ოპერატორი გააძევა, რომლებიც პროცესს იღებდნენ და პირდაპირ ეთერში გადასცემდნენ.

მოსამართლის განცხადებით, მან ჟურნალისტს "3-ჯერ მისცა შენიშვნა", რომ სხდომა პირდაპირ ეთერში არ გადაეცა. ჟურნალისტის თქმით, ის სხდომა წესების დაცვით, გვიან გადაიცემა და არა პირდაპირი ეთერის რეჟიმში. ამის მიუხედავად, მოსამართლემ გადამღებ ჯგუფს პროცესი დაატოვებინა.

მანამდე მოსამართლემ არ დააკმაყოფილა მზია ამაღლობელის ადვოკატის შუამდგომლობა ოცნების პრემიერის, ირაკლი კობახიძის დაკითხვის შესახებ. საქმე ეხება ირაკლი კობახიძის მიერ რუსთავი 2-ის ეთერში გაკეთებულ განცხადებას, სადაც ივანიშვილის პრემიერმა თქვა, რომ "მზია ამაღლობელი კონკრეტულ დაკვეთას ასრულებდა, მისი დავალება კი პოლიციის დაკნინება და ღირსების შეურაცხყოფა იყო".

მზია ამაღლობელის პროცესზე ბათუმის პოლიციის უფროსი, ირაკლი დგებუაძე იკითხება. სწორედ მისთვის სილის გაწვნის გამო ზის მზია ამაღლობელი საბრალდებო სკამზე.