დიდუბის მეტროდან წამოსული მოქალაქეები მსვლელობით საქართველოს პროკურატურასთან მივიდნენ. ისინი სკანდირებენ: "გადადექი", "სანქციები პროკურორს".

პროკურატურასთან მისულმა სტუდენტებმა მიმართვა წაიკითხეს. მათი თქმით, “ქართველი ხალხის მოთხოვნაა, გადადგეს არალეგიტიმური მთავრობა, ანუ „ქართული ოცნება” სამუდამოდ მოშორდეს საქართველოს!”

"ქართული ოცნების მიზანია, შექმნას ქვეყანა, სადაც ჩვენთვის, უბრალო ხალხისათვის არავითარი მომავალი არ იარსებებს, დაუსვით საკუთარ თავს კითხვა: რატომ ვართ ასეთი ღარიბები? ასეთი უძლურნი? მოსახლეობის უმრავლესობა იტანჯება გაუსაძლისი საცხოვრებელი პირობებით, უმუშევრობით, დაბალი ხელფასებით.

საოკუპაციო ხაზიდან იტაცებენ და კლავენ ადამიანებს, სკოლის მოსწავლეები შიმშილობენ, სტუდენტებს არ აქვთ საცხოვრებელი და სწავლის მაგივრად მუშაობაში ხარჯავენ დროს.

ოცნების დაუდევრობის შედეგად იხოცებიან ბავშვები, იკლო შობადობამ და საქართველოდან გარბიან ახალგაზრდები.

დედები მიდიან ემიგრაციაში, რომ საკუთარი ოჯახი არჩინონ, ქართველი მშრომელების უფლებებს და სატკივარს კი წლებია, მთავრობა უგულებელყოფს.

მალე საქართველო სრულ კრიზისში აღმოჩნდება.

გვეყო ლოდინი, ნუ ველით, რომ ვინმე გამოჩნდება, რადგან საკუთარ ჭირს თავადვე უნდა ვუშველოთ.

გამოსავალი არის ძალების კონსოლიდირება. ერთიანი ძალა შევქმნათ, რომელიც დაამარცხებს ქოცების ორგანიზებულ კრიმინალურ დაჯგუფებას!

მინდა, ყველას კიდევ ერთხელ შეგახსენოთ, ვის ვებრძვით: არჩევნების გაყალბების შემდეგ საქართველოში "ქართულმა ოცნებამ" დაამყარა ავტორიტარიზმი, ქვეყანას მართავს რუსული ტიპის რეჟიმი. ერთადერთი გამოსავალი მათი ერთობლივი ძალებით ქვეყნიდან გაძევებაა!

ხედავთ, როგორ აწყობენ ცირკს სასამართლოებში. ქართული ოცნება აპირებს მოქალაქეების წლობით ციხეში გამოკეტვას. გააუქმებენ ყველა თავისუფალ პარტიას, ყველა კრიტიკულ მედიას. მოსპობენ სამოქალაქო სექტორს, ყველა მოქალაქეს დევნა და დაპატიმრება გველის, თუ არ ვიბრძოლებთ უკომპრომისოდ და უშიშრად.

გახსოვდეთ, ჩვენ ფიცი გვაქვს დადებული!

ყველამ კარგად გაიგოს და მოისმინოს: ქართველი ხალხის მოთხოვნა არის შემდეგი, გადადგეს არალეგიტიმური მთავრობა, ანუ "ქართული ოცნება" სამუდამოდ მოშორდეს საქართველოს!

ჩვენი მოთხოვნა უნდა მოისმინონ ოპოზიციურმა პარტიებმაც და შეასრულონ ხალხის დაკვეთა. ბოიკოტი თვითმმართველობის არჩევნებს! და არავითარი ვაჭრობა და მოლაპარაკება "ქართულ ოცნებასთან".

გადადგეს არალეგიტიმური მთავრობა!

ერთობის გზა აუცილებლად მიგვიყვანს გამარჯვებამდე”, — ნათქვამი იყო მომართვაში, რომლის ტექსტსაც პუბლიკა ავრცელებს.