პუტინთან დაახლოებულმა ბიზნესმენმა და მოსკოვის ოლქის ვაჭრობის ყოფილმა მინისტრმა, მიხეილ ხუბუტიამ, ყოფილ მეგობარი ქალი სცემა. ამის შესახებ რუსული მედია წერს.

მათი ცნობით, ხუბუტიამ ქალს ორივე ფეხი მოტეხა, როდესაც მათ ქალიშვილს მეზობელ ოთახში ეძინა. ის ოდინცოვოს რაიონის სოფელ ტრეხგორკაში ჩავიდა, სადაც ჩაის სახლის "ვან ჩაის" მფლობელი იულია ვანი ცხოვრობს. მათ ურთიერთობა 2024 წლის დეკემბრამდე ჰქონდათ. წყვილს შვილიც ჰყავთ. მას შემდეგ, რაც ვანმა ურთიერთობის დასრულება გადაწყვიტა, ხუბუტიამ მისი მუქარა დაიწყო.

ქალის ნათესავების თქმით, ხუბუტია ვანს ქალიშვილის წართმევით, მთელი ქონების კონფისკაციითა და ფსიქიატრიულ საავადმყოფოში მოთავსებით დაემუქრა. პარასკევს, 25 აპრილს, ღამით, ის იულიასთან მივიდა, სახლში შეიჭრა და თავს დაესხა. ქალმა დახმარებისთვის ძიძას დაურეკა, რომელმაც პოლიცია და ვანის ნათესავები გამოიძახა, წერს რუსული მედია.

როდესაც სამართალდამცველები ადგილზე მივიდნენ, ხუბუტია უკვე წასული იყო. ქალი მრავლობითი დაზიანებებით საავადმყოფოში გადაიყვანეს. წინასწარი ინფორმაციით, ყოფილმა მინისტრმა თავდასხმის დროს ჩაქუჩი ან ნაჯახი გამოიყენა.

მომხდარის შესახებ იულია ვანი ინსტაგრამზე ჰყვება:

"მან მცემა, სულ სისხლში ვარ. მიშა, მიხეილ ხუბუტიამ მცემა, ის ნაჯახით მოვიდა და მცემა. ხელები სულ დაჭრილი მაქვს.

გუშინ ღამით იყო ჩემი მკვლელობის მცდელობა. დაახლოებით 23:00 საათზე, მიხეილ ხუბუტია ნაჯახით შემოიჭრა ჩემს სახლში, კიდურებში დამჭრა და თავში დამარტყა. ამ დროს ჩვენ ქალიშვილსა და ძიძას მეზობელ ოთახში ეძინათ.

2018 წლიდან ურთიერთობაში ვიყავით, გვყავს საერთო ქალიშვილი, 2024 წლის დეკემბერში დავშორდით, რის შემდეგაც ის განუწყვეტლივ მემუქრებოდა, რომ ბავშვს წამართმევდა, ყველა ქონებას ჩამომართმევდა, ფსიქიატრიულ საავადმყოფოში გამომკეტავდა, არაერთხელ მიმეორებდა, რომ ბავშვი არ სჭირდებოდა და ჩემს პირად ნივთებს ამტვრევდა. ახლა ექიმების მეთვალყურეობის ქვეშ ვარ. ხელებსა და ფეხებზე ღრმა ჭრილობებზე ნაკერი დამადეს," — აცხადებს იულია ვანი.