უკრაინის ომის დაწყების მესამე წლისთავთან დაკავშირებით, გაერო 2 განსხვავებულ რეზოლუციას განიხილავს — შეერთებულმა შტატებმა გაერთიანებული ერების ორგანიზაციაში წარმოადგინა რეზოლუცია, რომელშიც რუსეთის სამხედრო აგრესიასთან მიმართებით ნაკლებად მკაცრი ფორმულირებებია გამოყენებული. ამისგან საპირისპიროდ, ევროკავშირისა და უკრაინის ერთობლივი რეზოლუცია საკმაოდ მკაცრია.

აშშ-ის სახელმწიფო მდივნის, მარკო რუბიოს განცხადებით, აშშ-ის "მარტივი და ისტორიული" რეზოლუცია ომის საშინელებას და მის მსხვერპლს ეხება — რეზოლუციაში ნახსენები არ არის რუსეთის მიერ ოკუპირებული ტერიტორიები და არც აგრესორის როლია გამოკვეთილი ამ ომის დაწყებაში.

"პრეზიდენტ ტრამპს რუსეთ-უკრაინის ომის დასრულება მტკიცედ აქვს გადაწყვეტილი და მზად არის გადაწყვეტისთვის, რომელიც ხანგრძლივ მშვიდობას გამოიწვევს და არა დროებით პაუზას. ორშაბათს, 24 თებერვალს, რუსეთ-უკრაინის ომის დაწყებიდან სამი წელი გადის. ეს ომი დიდხანს და რუსეთისა და უკრაინისთვის საშინელ ფასად გაგრძელდა", — განაცხადა მარკო რუბიომ.

რაც შეეხება ევროკავშირისა და უკრაინის ერთობლივ რეზოლუციას, აქ ცენტრალური ფორმულირება "უკრაინაში რუსეთის ფედერაციის სრულმასშტაბიანი შეჭრაა" და შეიცავს მოთხოვნას, დაუყოვნებლივ და უპირობოდ გაიყვანოს მთელი თავისი ძალები რუსეთის ფედერაციამ.