აშშ-ს ვიცე-პრეზიდენტი ჯ.დ. ვენსი მიუნხენის უსაფრთხოების კონფერენციაზე უკრაინის პრეზიდენტს, ვოლოდიმირ ზელენსკის შეხვდება, — ამის შესახებ CBS News იტყობინება.

ზელენსკი უსაფრთხოების ყოველწლიურ კონფერენციაზე უკრაინის დელეგაციას უხელმძღვანელებს, რომელიც 14 თებერვალს გაიხსნება და 16-ში დაიხურება. დაგეგმილი შეხვედრის შესახებ პირველად New York Post-მა გაავრცელა ინფორმაცია.

აშშ-ს პრეზიდენტის ადმინისტრაციისა და უკრაინის პრეზიდენტის შეხვედრა მას შემდეგ დაიგეგმა, რაც პრეზიდენტმა ტრამპმა ჟურნალისტებს პარასკევს, ოვალურ კაბინეტში, განუცხადა, რომ ის უახლოეს დღეებში "შეიძლება შეხვდეს" უკრაინის ლიდერს.

"მე ალბათ მომავალ კვირას შევხვდები პრეზიდენტ ზელენსკის და ალბათ ვესაუბრები პრეზიდენტ პუტინს, მინდა, რომ ეს ომი დასრულდეს", — თქვა ტრამპმა.

გასულ კვირას, უკრაინის დელეგაციამ შეხვედრები გამართა სახელმწიფო დეპარტამენტში უკრაინა-რუსეთის წარმომადგენელთან გენერალ კით კელოგთან.

CBS News წერს, რომ ტრამპმა არაერთხელ დადო პირობა, რომ დაასრულებს ომს უკრაინასა და რუსეთს შორის, რომელიც 2022 წლის თებერვალში რუსეთის მიერ უკრაინაში შეჭრით დაიწყო. იმავდროულად, გასულ კვირას ტრამპმა თქვა, რომ უკრაინის მომავალი სამხედრო დახმარება შეიძლება დამოკიდებული იყოს კიევის იშვიათი წიაღისეულის ვაჭრობაზე და დაამატა — "ჩვენ გვჭირდება გარანტიები", — თქვა ტრამპმა.

"ასე რომ, ჩვენ ვცდილობთ დავდოთ შეთანხმება უკრაინასთან, სადაც ისინი მიიღებენ იმას, რასაც ჩვენ ვაძლევთ მათი იშვიათი წიაღისეულის სანაცვლოდ", — თქვა ტრამპმა.