ინგოროყვას საუნივერსიტეტო კლინიკის ინფორმაციით, 2 თებერვლის აქციაზე დაკავებულ 4 მომიტინგეს, რომელიც კლინიკაში შეიყვანეს, თავის ტვინის შერყევა აღენიშნება. ინფორმაციას და ექიმის კომენტარს ინტერპრესნიუსი ავრცელებს.

ექიმის თქმით, იზოლატორებიდან მიყვანილ პაციენტებს აღენიშნებათ სახის და თავის ტრავმა და თავის ტვინის შერყევა.

"გუშინ, საღამოს, დაახლოებით 22:00 საათზე, წინასწარი დაკავების იზოლატორიდან 5 დაშავებული შემოიყვანეს. აქედან 4 პაციენტი ჰოსპიტალიზებულია, ერთმა პაციენტმა საკუთარი სურვილით დატოვა კლინიკა, სხვა კლინიკაში გადავიდა. ძირითადად აღენიშნებოდათ სახის და თავის ტრავმა. თავის ტვინის შერყევით არის მოთავსებული ოთხივე პაციენტი", — აღნიშნა ექიმმა.

შსს-ის ინფორმაციით, 2 თებერვალს თბილისში მიმდინარე საპროტესტო აქციაზე სამართალდამცავებმა 31 პირი დააკავეს. ყველა მომიტინგე ადმინისტრაციული წესით დააკავეს, — მათი ნაწილი ხელწერილის საფუძველზე გათავისუფლდა.