"ბათუმელებო, თქვენთან ჩამოვედი იმისთვის, რომ გამოგიცხადოთ სრული სოლიდარობა და პატივისცემა იმიტომ, რომ აქედან დაიწყო უშუალოდ პროტესტი", — ამის შესახებ საქართველოს მე-5 პრეზიდენტმა, სალომე ზურაბიშვილმა ბათუმის სახელმწიფო უნივერსიტეტის მიმდინარე საპროტესტო აქციაზე გამოსვლისას განაცხადა.

ზურაბიშვილმა თქვა, რომ სურს დღევანდელი დღე მზია ამაღლობელს მიუძღვნას.

"ბათუმელებო, თქვენთან ჩამოვედი იმისთვის, რომ გამოგიცხადოთ სრული სოლიდარობა და პატივისცემა იმიტომ, რომ აქედან დაიწყო უშუალოდ პროტესტი. თქვენ ხართ წყარო ამ პროტესტის, რომელიც დღემდე მოდის და ძალიან რთულ პირობებში მინდა დღევანდელი დღე მივუძღვნა მზია ამაღლობელს. ის არის დღეს ჩვენი ქვეყნის სახე, ის არის დღეს ჩვენი ღირსების სახე, ის არის დღეს ჩვენი მომავლის სახე და ამიტომ ვართ ყველანი ერთად და მასთან ერთად ვიქნებით. დარწმუნებული ვარ, რომ ის კარგად და ძლიერად იქნება იმიტომ, რომ დღეს ის არის საქართველო...

მე გამოსაჩენად არ ჩამოვსულვარ, ჩამოვედი, რომ გამოგიცხადოთ სოლიდარობა და გითხრათ, რომ თქვენთან ვიქნები ბოლომდე - ბოლო არის ჩვენი გამარჯვება, საქართველოს გამარჯვება," — განაცხადა სალომე ზურაბიშვილმა.

ბათუმის სახელმწიფო უნივერსიტეტის აქციიდან სალომე ზურაბიშვილმა ევროპის მოედანზე გადაინაცვლა, სადაც ახალი თეატრის მანიფესტი მიმდინარეობს.

დღეს სალომე ზურაბიშვილი ბათუმის აქციებში მონაწილე აქტივისტებსაც შეხვდა.

პრესსამსახურის ცნობით, შეხვედრას საპატიმროებიდან უკვე გათავისუფლებული აქტივისტები და რეჟიმის მიერ დაპატიმრებული აქტივისტების ოჯახის წევრები ესწრებოდნენ.

"პრეზიდენტის განცხადებით, მნიშვნელოვანია, რომ სახალხო პროტესტი მთელი საქართველოს მასშტაბით გაიშალა, აქტიურობენ რეგიონები და ამ პროცესების ეპიცენტრშია ბათუმი, სადაც დღეს უკვე ამ პროტესტმა კონკრეტული სახე და სახელი შეიძინა — მზია ამაღლობელი.

ადგილობრივმა აქტივისტებმა პრეზიდენტ სალომე ზურაბიშვილს აქციებზე დაკავების, წინასწარი დაკავების საკნებში მოპყრობისა და გასამართლების პროცესის შესახებ დეტალური ინფორმაცია მიაწოდეს და პირადი მაგალითის საფუძველზე ფიზიკური და სიტყვიერი შეურაცხყოფისა და არაადამიანური მოპყრობის შესახებ ისაუბრეს," —ნათქვამია გავრცელებულ ინფორმაციაში.