მოდის ქართველ დიზაინერსა და ცნობილი ბრენდის, Balenciaga-ის, შემოქმედებით ხელმძღვანელს, დემნას, საფრანგეთის ხელოვნების რაინდის წოდება მიენიჭა. კავალრის მედალი დემნას ქვეყნის კულტურის მინისტრმა, რაშიდა დატიმ, გადასცა.

დემნა პირველი ქართველი დიზაინერია, რომელმაც ეს ჯილდო მიიღო.

ხელოვნებისა და ლიტერატურის რაინდის (Ordre des Arts et des Lettres) წოდება საფრანგეთში ერთ-ერთ ყველაზე პრესტიჟულ ჯილდოდ მიიჩნევა, რომელიც ენიჭებათ სახელოვნებო სფეროს გამორჩეულ წარმომადგენლებს: მხატვრებს, მუსიკოსებს, მწერლებს, მსახიობებს და სხვა. ეს ჯილდო სხვადასხვა დროს გადაეცათ ისეთ აღიარებულ ხელოვანებს, როგორებიც არიან მწერალი ხორხე ლუის ბორხესი, მუსიკოსი დევიდ ბოუი, მსახიობი და რეჟისორი კლინტ ისტვუდი და დიზაინერი კარლ ლაგერფელდი.

დემნას გარდა, ხელოვნების რაინდის წოდება არაერთ ქართველ ხელოვანსაც აქვს მინიჭებული, მათ შორის, მოქანდაკე გუჯი ამაშუკელსა და რეჟისორებს, ლანა ღოღობერიძესა და გიორგი ოვაშვილს.

დემნას საერთაშორისო აღიარებას კი სხვა არაერთი ჯილდოც მოწმობს, მაგალითად, ამერიკის მოდის დიზაინერთა საბჭოს პრიზი, რომელიც მას 2021 წელს გადაეცა. 2022 წელს დემნა ჟურნალმა Time-მა მსოფლიოში 100 ყველაზე გავლენიან ადამიანს შორისაც დაასახელა. დიზაინერს საქართველოშიც აქვს მინიჭებული ღირსების მედალი.