აშშ-ის პრეზიდენტმა დონალდ ტრამპმა 23 იანვარს გამოსცა განკარგულება იმის შესახებ, რომ გასაჯაროვდება 35-ე პრეზიდენტის, ჯონ კენედის მკვლელობასთან დაკავშირებული საიდუმლო დოკუმენტები, ისევე როგორც პრეზიდენტ კენედის ძმის, სენატორ რობერტ კენედის და მისი რასობრივი თანასწორობისთვის მებრძოლი სასულიერო პირის, მარტინ ლუთერ კინგის მკვლელობების საქმის მასალები.

აღნიშნულთან დაკავშირებით ტრამპმა განაცხადა, მისი პოზიციაა, რომ ამერიკელმა ხალხმა, მკვლელობებიდან 50 წელზე მეტი ხნის შემდეგ სიმართლე უნდა იცოდნენ.

დონალდ ტრამპს, 15 დღის ვადაში ეროვნული დაზვერვის სამსახურის დირექტორმა და გენერალურმა პროკურორმა ეროვნული უსაფრთხოების საკითხებში პრეზიდენტის მრჩეველსა და თანაშემწესთან ერთად, უნდა წარუდგინონ ჯო კენედის მკვლელობის გამოძიების მასალების გამოქვეყნების თემა.

გავრცელებული ინფორმაციით, კენედის და მარტინ ლუთერ კინგის მკვლელობის საგამოძიებო დოკუმენტების გამოქვეყნების გეგმა 45 დღეში უნდა მომზადდეს.

ცნობისთვის, დალასში, 1963 წლის 22 ნოემბერს აშშ-ის 35-ე პრეზიდენტი ჯონ კენედი მოკლეს, ხოლო მის მკვლელობაში ეჭვმიტანილს, ყოფილ საზღვაო ქვეით ლი ჰარვი ოსვალდს, დაკავებიდან რამდენიმე დღეში, პოლიციის განყოფილებიდან საპატიმროში გადაყვანის დროს, ღამის კლუბის მფლობელმა ჯეკ რუბიმ ცეცხლსასროლი იარაღით სასიკვდილო ჭრილობა მიაყენა. ეჭვმიტანილ ლი ჰარვი ოსვალდი დანაშაულს იარყოფდა.

ამასთან, კენედის უმცროს ძმას, აშშ-ის გენერალურ პროკურორს, სენატორ კენედის, 1968 წლის 5 ივნისს ლოს-ანჯელესში, საარჩევნო მიტინგზე ესროლეს. იგი აპირებდა დემოკრატიული პარტიიდან პრეზიდენტად კენჭისყრას. დანაშაულის ადგილზე დააკავეს სერჰან სერჰანი. 1969 წელს მას სიკვდილი მიუსაჯეს, თუმცა მოგვიანებით სამუდამო პატიმრობით შეუცვალეს.

რასობრივი თანასწორობისთვის მებრძოლი ბაპტისტი სასულიერო პირი და ორატორი მარტინ ლუთერ კინგი 1968 წლის 4 აპრილს მოკლეს ქალაქ მემფისში. მკვლელობისთვის 99 წლით პატიმრობა მიუსაჯეს ადრეც არაერთხელ ნასამართლევ ჯეიმს ერლ რეის. ის 1988 წელს ციხეში გარდაიცვალა.