"დიდი შვიდეულის" ლიდერები, ისრაელსა და "ჰამასს" შორის, ცეცხლის შეწყვეტასთან დაკავშირებით მიღწეული შეთანხმების შესახებ განცხადებას ავრცელებენ და აღნიშნავენ, რომ "ეს არის მნიშვნელოვანი განვითარება, რომელსაც აქვს პოტენციალი უზრუნველყოს ყველა დარჩენილი მძევლის გათავისუფლება".

"ჩვენ, “დიდი შვიდეულის“ ლიდერები სრულად ვუჭერთ მხარს ისრაელსა და ჰამასს შორის მიღწეული ცეცხლის შეწყვეტის შეთანხმებას. ეს არის მნიშვნელოვანი განვითარება, რომელსაც აქვს პოტენციალი უზრუნველყოს ყველა დარჩენილი მძევლის გათავისუფლება", — წერია განცხადებაში.

ამასთან, ისინი აღნიშნავენ, რომ სასწრაფოდ არის საჭირო ჰუმანიტარული დახმარების ხელშეწყობა და მშვიდობიანი მოქალაქეებისთვის გზის გახსნა. ისინი მოუწოდებენ დაუშვან ჰუმანიტარული დახმარების უსაფრთხო, სწრაფი და შეუფერხებელი გადაადგილება და უზრუნველყონ მშვიდობიანი მოსახლეობის, მათ შორის ჰუმანიტარული მუშაკების დაცვა.

"მადლობას ვუხდით ეგვიპტეს, კატარს და შეერთებულ შტატებს ამ მოლაპარაკებების შუამავლობაში დაუღალავი ძალისხმევისთვის და მოვუწოდებთ ყველა მხარეს, პატივი სცენ შეთანხმების პირობებს. ჩვენ ასევე მოვუწოდებთ ყველა მხარეს კონსტრუქციულად ჩაერთონ შეთანხმების შემდგომ ეტაპებზე მოლაპარაკებებში, რათა უზრუნველყონ მისი სრული განხორციელება და საომარი მოქმედებების მუდმივი დასრულება", — აღნიშნულია განცხადებაში.

განცხადებაში "დიდი შვიდეულის" ლიდერები მოუწოდებენ ირანს და მის მოკავშირეებს, რომ ისრაელის წინააღმდეგ შემდგომი თავდასხმებისგან თავი შეიკავონ.

"მოვუწოდებთ ირანს და მის მარიონეტებს, თავი შეიკავონ ისრაელის წინააღმდეგ შემდგომი თავდასხმებისგან. ვადასტურებთ ჩვენს მხარდაჭერას ისრაელის უსაფრთხოებისადმი ამ საფრთხეების ფონზე", — აღნიშნულია განცხადებაში.

მასთან, განცხადებაში ხაზგასმულია, რომ „დიდი შვიდეული“ მხარს უჭერს ისრაელი-პალესტინის კონფლიქტის ორი სახელმწიფოს პრინციპით მოგვარებას.

"კიდევ ერთხელ ვადასტურებთ ჩვენს მხარდაჭერას მშვიდობისკენ მიმავალი სანდო გზის მიმართ, რომელიც კონფლიქტის ორი სახელმწიფოს პრინციპით გადაწყვეტამდე მიდის, სადაც ისრაელელები და პალესტინელები იცხოვრებენ გვერდიგვერდ მშვიდობით, ღირსებითა და უსაფრთხოებით“, — აღნიშნულია განცხადებაში.