მედიის ადვოკატების კოალიცია "ბათუმელების" და "ნეტგაზეთის" დამფუძნებლისა და დირექტორის, მზია ამაღლობელის "უკანონო" დაკავების ფაქტს ეხმაურება და მოითხოვს მის დაუყოვნებლივ გათავისუფლებას.

მათი თქმით, "შემაშფოთებელია" ის ფაქტი, რომ მედიის წარმომადგენლის და სხვა ათი პირის დაკავება მშვიდობიანი საპროტესტო აქციის დროს მოხდა.

"მედიის ადვოკატირების კოალიცია ეხმაურება გამოცემა "ბათუმელების" დირექტორის, მზია ამაღლობელის უკანონო დაკავებას და მოითხოვს მის დაუყოვნებლივ გათავისუფლებას.

განსაკუთრებით შემაშფოთებელია, რომ მედიის წარმომადგენლის დაკავება მოხდა მშვიდობიანი საპროტესტო აქციის დროს, სადაც პოლიციამ ასევე უკანონოდ დააკავა ათამდე მოქალაქე. აღსანიშნავია, რომ დაკავების საფუძველი — კედელზე წარწერის "იფიცება საქართველო" განთავსება — წარმოადგენს გამოხატვის თავისუფლების ლეგიტიმურ ფორმას.

კოალიცია აღნიშნავს, რომ ქართული ოცნება აგრძელებს მედიის წარმომადგენლებზე ზეწოლას და მათი საქმიანობის შეზღუდვას. განსაკუთრებით საგანგაშოა, რომ მაშინ, როდესაც აქციის მონაწილეთა მიმართ ძალადობის ჩამდენ პირთა მიმართ გამოძიება არ მიმდინარეობს, პოლიცია უკანონოდ აკავებს მშვიდობიან მომიტინგეებს და მედიის წარმომადგენლებს.

მედიის ადვოკატირების კოალიცია მოითხოვს დაუყოვნებლივ გათავისუფლდეს მზია ამაღლობელი, ასევე, სხვა უკანონოდ დაკავებული პირები და წინასწარ პატიმრობაში მყოფი პოლიტპატიმრები.

განახლება: დაკავებული მზია ამაღლობელი გაათავისუფლეს, რის შემდეგაც ხელახლა დააკავეს რამდენიმე წუთში", — წერია მედიის ადვოკატების კოალიციის მიერ გავრცელებულ განცხადებაში.