ინფორმაციის თავისუფლების განვითარების ინსტიტუტი (IDFI) კომუნიკაციების მარეგულირებელ კომისიას საკანონმდებლო წინადადებით მიმართავს, რომელიც ინტერნეტში დაუშვებელი პროდუქციის რეგულაციას შეეხება.

ორგანიზაციის თქმით, კომისიის მიერ მიღებული დადგენილება "ელექტრონული კომუნიკაციების სფეროში მომსახურების მიწოდების წესებისა და მომხმარებელთა უფლებების დაცვის შესახებ", რომელშიც განსაზღვრულია "დაუშვებელი პროდუქციის" ცნება გამოხატვის თავისუფლებას ზღუდავს:

"დადგენილება ითვალისწინებს გამოხატვის თავისუფლების შეზღუდვის არაერთ საფუძველს, შესაბამისად, მისი პრაქტიკაში გაუმართლებლად და გადაჭარბებულად გამოყენების შემთხვევაში, შეიძლება ქვეყანაში გამოხატვის თავისუფლების დაცვის სტანდარტებს სერიოზული საფრთხე შეექმნას".

IDFI-ს მიერ ჩატარებული კვლევის მიხედვით, საქართველოს კომუნიკაციების ეროვნული კომისიის დადგენილებით განსაზღვრული "დაუშვებელი პროდუქციის ცნების" კომპონენტები ვერ პასუხობს გამოხატვის თავისუფლების შეზღუდვის ადგილობრივ და საერთაშორისო სტანდარტებს:

"IDFI-მ წარმოადგინა დადგენილებაში ცვლილების შეტანის შესახებ პროექტი, რომლის მიზანიც აღმოჩენილი ხარვეზების გასწორება და კანონმდებლობის დონეზე გამოხატვის თავისუფლების დაცვის სტანდარტების ამაღლებაა."

ორგანიზაციას მაგალითად მოჰყავს, 2016 წელს YouTube-ისა და Wordpress-ის დროებითი დაბლოკვის ფაქტები და ამბობს, რომ მედიასა და საზოგადოებას დღემდე არ მიეწოდა ოფიციალური ინფორმაცია, თუ რატომ შეიზღუდა ხელმისაწვდომობა კონკრეტულ საერთაშორისო პლატფორმებზე.